Teo, 20/04/2026 – O Concello de Teo celebra o 180 aniversario da Batalla de Cacheiras cun desfile popular desde Cacheiras e unha recreación histórica deste evento no cumio de Montouto, o vindeiro sábado, 25 de abril, a partir das 11.30 horas.
A actividade comezará cun desfile popular desde o monólito a Ánxel Casal, situado un pouco máis abaixo da praza da Estivada da Ribeira, na parroquia de Cacheiras, ata o Alto de Montouto.
Os asistentes acompañarán ás tropas liberais nun percorrido simbólico cara ao campo de batalla, convertendo o espazo público do Alto de Montouto nun escenario vivo. Alí levarase a cabo unha recreación histórica que revive os acontecementos de 1846, combinando palabra, música e movemento nunha experiencia colectiva e emocionante.
A dirección escénica e a narración correrán a cargo do actor e historiador Suso Martínez e contará coa participación da Asociación Cultural e Teatral Abril de Lume e Ferro de Carral, a Aula de Teatro do IES Cacheiras, a Asociación Cultural Entroido de Cacheiras, a Banda de Música da Sociedade Recreativa de Calo, así como doutras asociacións e persoas que se sumarán a esta celebración.
A historia
O 23 de abril de 1846 é un día marcado na historia e Teo e de Galicia, porque supuxo a derrota, á altura de Montouto, do exército liberal que se levantou contra o goberno centralista de Narváez e Isabel II. A raíz desa batalla, o xeneral Miguel Solís Cuetos e 11 dos seus oficiais foron fusilados o 26 de abril, converténdose nos Mártires de Carral.
Carreira popular
Tamén con motivo deste enfrontamento, o Concello organiza todos os anos a famosa carreira pedestre “A Batalla de Cacheiras”, que discorre polo Concello de Teo e que congrega -ano tras ano- a centos de participantes. Será o vindeiro domingo, 10 de maio, e o prazo de inscrición está aberto ata o vindeiro 6 de maio na páxina https://emesports.es/.
Unha cita máis que destacada no calendario deportivo e que permite a grandes e pequenos a desfrutar dunha xornada de deporte, ocio e moita historia.
