A Comisión especial para analizar a forma máis sustentable e eficiente da xestión do ciclo integral da auga reuníase este luns para tomar unha decisión sobre o modelo a levar a pleno. Máis ala dos argumentos das partes as posturas eran claras e o resultado esperado.
O goberno municipal, BNG e Compostela Aberta, propuxeron unha fórmula mixta que permite un maior control. A proposta foi rexeitada e o Psoe solicitou unha segunda votación sobre o modelo de concesión que foi finalmente aprobado cos votos do PP e do Psoe.
Os socialistas levaban tempo defendendo un modelo de concesión para a auga. Máis en este caso argumentan “falta de información” para tomar como referencia o informe realizado en época de Sánchez Bugallo e obviar o realizado pola Universidade da Coruña.
O Partido Popular pola súa banda emitiu unha nota de prensa na que destaca o feito de que o Psoe vote en contra do modelo proposto por BNG e CA, lembrando que apoiaron a investidura como alcaldesa de Goretti Sanmartín,
Na nota dos populares en ningún momento se fai referencia ao voto contrario ou orque se prefiere o modelo de concesión ao de empresa mixta para a auga. As concelleiras non adscritas, que non puideron votar na Comisión, deixan en evidencia ao PP xa que lembran que en setembro do 2022 votaron en contra do que agora apoiaron.
As non adscritas consideran que a Comisión foi unha “cortina de fume que permite ao BNG xustificarse diante de Compostela Aberta para acabar aplicando o modelo que usan onde gobernan”. Un modelo que previsiblemente será aprobado por maioría no vindeiro pleno.
Dúbidas razoables sobre o pasado da xestión da auga
Certo é que a experiencia con concesións da auga en Santiago non foi boa. Moitos aínda lembran a operación Pokemon e o papel que a empresa Aquagest, integrada agora en Viaqua, tivo na cidade segundo o sumario.
Nos concellos limítrofes a xestión da auga é municipal, ven directa como en Teo ou por medio dunha empresa municipal como en Ames. Hai que lembrar o proxecto que Martiño Noriega perseguiu estando de alcalde en Compostela, xestións públicas da auga en Teo, Ames e Santiago que permitiran unha colaboración que abaratara os custos.
En Santiago o debate de fondo é como afrontar as numerosas, e caras, obras que hai que levar a cabo. Tal vez na licitación veremos canto están dispostas a aportar as empresas e a cambio de que. Polo momento so sabemos que, case con total seguridade, o modelo será por concesión.
