SONY DSC
Compostela, 9 de decembro do 2024 – Cobrar máis en festivos e fins de semana é o normal; o di a xustiza ao rexeitar o recurso dun sindicato á decisión do goberno socialista de Sánchez Bugallo de abonar o plus de festividade ao persoal municipal.
Como era de esperar o Grupo Municipal Socialista valora positivamente a resolución entendendo que “reafirma a xestión do goberno do PsdeG”. O recurso do sindicato remóntase á decisión da xunta de goberno local do 20 de xullo de 2020, con Sánchez Bugallo como alcalde, na que se aprobou o pago dese plus e que, sobre todo, beneficiaría á Policía Local e ao servizo de extinción de incendios. Unha decisión que atendía a unha reclamación do persoal municipal.
A edil socialista, Marta Abal, aseguraba que a sentenza recoñece como lexítimo que o executivo decidise abonar ese plus de festividade en lugar de compensar o traballo realizado en días festivos con tempo libre.
Unha decisión, insiste, imprescindible para garantir os servizos: “de optar pola compensación con tempo de descanso corríamos o risco de quedármonos sen efectivos suficientes para garantir a seguridade e unha actuación eficiente ante posibles eventualidades”.
“Fixemos o que tiñamos que facer”
Abal reafirmase na actuación do executivo liderado polo alcalde Sánchez Bugallo, asegurando que, “logo da polémica artificial que algúns se esforzaron en xerar”, coa resolución xudicial “queda claro que fixemos o que tiñamos que facer para garantir os servizos”.
Engaden desde as filas socialistas que o número de efectivos, sobre todo na Policía Local, “segue a ser deficitario” e instan ao goberno local a traballar para “reforzar a plantilla”, precisamente ante “oportunidade” da retirada de taxa de reposición e sabendo que nos vindeiros anos xubilaranse 15 novos axentes. Insiste tamén en atender a súa petición de elaborar un novo calendario para a organización de efectivos.
