Silleda, 10 de xuño do 2022 – Silleda recupera a Romaría da Rapazada que celebrará a súa trixésimo segunda edición o vindeiro domingo día 19.
A cita, no recinto da Saleta, en Siador, contará con actividades xa clásicas e terá como lema “Volta a nosa festa”. A Romaría Rapazada regresa despois de dous anos de silencia nunha xornada única que tamén vira o seu nome cara a un título máis inclusivo.
Esta festa singular e única en Galicia, onde a cativada é a protagonista, arrancará ás 11.00 horas coa apertura de obradoiros, inchables, actividades e actividades multiaventura, que continuarán durante toda a xornada.
Entre os obradoiros figuran un de tatuaxes temporais, de maquillaxe, de pulseiras, de chapas, animais móbiles, e outro de gorros divertidos coordinado este último pola Anpa Raparigos. Os nenos poderán desfrutar este ano con outras actividades pedagóxicas como o espazo ludoteca para os máis pequenos e distintas actividades baixo o eixo da igualdade na chamada área violeta.
Gran tirolina de 100 metros e tobogán acuático
En canto ás actividades multiaventura a Romaría do Rapaz contará este ano de novo cunha tirolina de grandes dimensións, con 100 metros de percorrido e tobogán xigante Río Bravo de 60 metros. A zona multiaventura contará tamén cun rocódromo, e 4 xogos hinchables, así como as bolas zorbing..
Animación do recinto
Durante toda a xornada celebraranse outras actividades como un fotocol, e a animación da Superpandi, con personaxes de Disney. Xa pola tarde celebrarase outro obradoiro de música e baile tradicional impartido pola agrupación Xirandola.
Haberá tamén unha caseta de información aberta durante toda a xornada na que se poderán mercar pulseiras localizadoras, e camisetas conmemorativas deste certame. Todo o recadado destinarase ao programa municipal Silleda Solidaria. Tamén haberá outras actividades sorpresa.
Fin de festa con Xirandola e Banda Xuvenil
A Romaría Rapazada rematará co espectáculo final con selo silledense: actuarán no anfiteatro a Escola de Baile do grupo Xirandola e a Banda de Música Infantil de Silleda, que estarán no partir das 19:00 horas. Tamén se sortearán agasallos entre a rapazada que visite todos os obradoiros e actividades.
Dende o Concello de Silleda, que organiza este evento, agradécese a inestimable colabroación dos Padres Saletinos e da veciñanza de Siador. Así mesmo, tamén se fai un chamamento á colaboración das persoas asistentes á hora de aparcar (lémbrase que hai aparcamentos de balde no entorno do recinto) e respetar a sinalización en canto a circulación do tráfico na zona
O recinto volverá a contar con servizo de bar e xantar. Haberá mesas e sillas a disposición das persoas e grupos que queiran xantar na carballeira do recinto durante a xornada.
