Bisbarra, 20 de setembro do 2023 – Preocupación no concello de Silleda polos actos vandálicos que puxeron en risco aos usuarios de dúas marquesiñas de bus.
O concello detectou que alguén retirou os parafusos que suxeitan os cristais de dúas marquesiñas de autobús da rúa Trasdeza. O alcalde, Manuel Cuíña, dia que “É un acto de extrema gravidade, xa que ao quedar as láminas soltas, mesmo cun golpe de vento, os cristais poden desprenderse co perigo que iso conleva”.
Os servizos municipais de mantemento xa procederon, unha vez revisadas as dúas estruturas, a colocar novamente os elementos de suxeición, se ben nas últimas horas comprobouse que novamente volveron a faltar algunhas pezas das marquesiñas.
“É un acto temerario que pon en risco a vida das persoas usuarias destas paradas, polo que de localizar á persoa ou persoas responsables, se actuará con todo o peso da Lei”, engade o rexedor.
A Policía Local intensificará a vixilancia neste punto se ben dende o goberno municipal apélase tamén á colaboración cidadá para dar cas persoas autoras desta “temeridade que vai máis aló dun simple acto vandálico”, di Cuíña.
Este suceso supón un serio risco para a cidadanía de Silleda, tanto para as persoas usuarias das liñas de transporte por estrada, como para calquera persoa viandante.
