Bisbarra, 17 de febreiro do 2023 – O alcalde de Silleda, Manuel Cuiña, comunicou á veciñanza do Barrio do Campo que Plenoil non instalará a gasolineira e buscará outra ubicación.
Cuiña dixo que a búsqueda de outra ubicación para a gasolineira “é froito da xestión dos últimos meses pero tamén un triunfo da veciñanza que se mantivo firme”. Segundo explicou, a empresa ten previsto tramitar nas vindeiras datas os permisos pertinentes para a novo lugar.
Os veciños presentes amosaron a súa ledicia por este cambio despois de tres anos de loita para evitar a que a gasolineira se instalase no barrio. O pasado mes de outubro coñeceuse o fallo xudicial que estimou o recurso da firma Plenoil contra a decisión da Xunta de Galicia de non formular declaración de incidencia ambiental.
O goberno local, que se personou na causa, sempre mantivo que a ubicación, tan preto de vivendas e edificios, non era a axeitada e convidou dende o primeiro momento á empresa a buscar outras alternativas.
O Concello de Silleda, que seguiu en contacto cos veciños residentes nas inmediacións da parcela de Barrio do Campo dende que a empresa presentou o proxecto en outubro de 2019, alegou en xaneiro de 2021 contra a ubicación da gasolineira, aducindo entre outros a proximidade a vivendas.
Un mes despois, en febreiro dese mesmo ano, a Consellería de Medio Ambiente resolveu que non procedía a declaración de incidencia ambiental en base ao informe do Concello de data 14 de xaneiro de 2021 no que se advertía que o uso solicitado non era compatible co Plan Xeral aprobado provisionalmente para o municipio de Silleda.
“Sempre dixemos que non nos gustaba a ubicación proposta, moi preto de vivendas”, sinala o alcalde, Manuel Cuiña, Plenoil recorreu a decisión autonómica, nunha demanda na que tamén se personou o Concello de Silleda e os veciños da contorna. Ese recurso dou pé á sentenza do pasado mes de outubro.
