Bisbarra, 14 de marzo do 2023 – A parroquia de Graba, en Silleda, acollerá o 1 de abril a Festa do raxo que se suma aos eventos gastronómicos da bisbarra de Compostela.
Organizada pola Asociación Socio Cultural Coto do Castelo, a Festa do raxo celebrarase no campo da festa a partir das dez da noite o que supón tamén unha novidades en este tipo de citas.
O evento foi presentado no concello de Silleda polo presidente da Asociación, Martiño Novo Canda; o vocal Daniel Areán Filloy; o alcalde, Manuel Cuiña, e a concelleira de Cultura, Mónica González.
Martiño Novo explicou que “En Graba viñamos celebrando en agosto a Festa do Bolo Preñado e o Mexilón, se ben son produtos con pouco arraigo, por iso decidimos apostar polo raxo”. Engade que se trata dunha aposta polo sector porcino e lembra que “o raxo é un dos produtos que máis gustan e con máis tradición”.
Pola súa banda o alcalde, Manuel Cuiña, felicitou á entidade organizadora, ca que colabora o Concello de Silleda, por esta nova aposta, con máis relación co territorio, e á que desexou unha longa vida.
Con este cambio tamén nas datas, a asociación busca tamén “desestacionalizar as celebracións gastronómicas, que adoitan celebrarse todas no verán”. A festa terá lugar o 1 de abril pola noite, a partir das 22:00 horas, cun menú composto por raxo de porco con patacas fritidas e pementos, sobremesa, bebida, pan e café, a un prezo de 15 euros por persoa (10 euros para nenos e nenas menores de 10 anos).
Tamén haberá servizo de polbeiro. Os tickets poden retirarse na Taberna de Graba; Cobideza; Agroservizos Alberto; Decores e Doar. Para máis información as persoas interesadas poden chamar aos teléfonos 669 295 340 ou 689 374 614. A Festa do Raxo estará amenizada polo dúo Aires de Broña e o DJ Marcos Kintana.
