Silleda, 27 de maio do 2018 – O goberno municipal de Silleda segue agardando pola reunión solicitada á Consellería do Medio Ambiente , da que depende o organismo Augas de Galicia, para tratar de superar a parálise na que está sumido o PXOM.
O alcalde de Silleda, Manuel Cuiña, mantivo a principios de mes un encontro con membros do equipo de goberno, técnicos municipais e con Alfonso Botana, redactor do PXOM de Silleda para analizar a situación do Plan Xeral de Urbanismo. Nada máis rematar o encontro solicitouse un encontro ca conselleira de Medio Ambiente, da que depende o organismo Augas de Galicia, “con carácter de máxima urxencia” para estudar posibles solución, pero a día de hoxe aínda non se teñen noticias da concellería. En novembro do pasado ano xa se deu conta no pleno dun acordo da Xunta de Goberno local para reclamar á Dirección Xeral de Ordenación do Territorio a aprobación definitiva do Plan Xeral de Silleda. Meses antes, o Concello recibirá un escrito solicitando demostrar a “suficiencia de recursos hídricos” baseándose en sentenzas e esixindo cuestións como a legalización das traídas. Posteriormente enviouse documentación sobre a legalización de traídas de augas de Silleda e da Bandeira sen que dende o organismo se emitira un informe positivo.
O alcalde, Manuel Cuiña, advirte que de non ter noticias nos vindeiros días, no pleno ordinario que se celebrará o vindeiro xoves día 31 “estudaremos a adopción das medidas oportunas ante a paralización dun dos proxectos máis importantes para o futuro do noso municipio. Non podemos seguir así. É case unha tomadura de pelo que non nos reciban para falar dunha cuestión que está coartando o futuro de Silleda, cando temos xa informes favorables do resto dos organismos”, di o alcalde lembrando que o PXOM de Silleda foi aprobado provisionalmente en marzo de 2016.