Bisbarra, 21 de outubro do 2022 – Máis de tres mil euros en premios destinará o goberno municipal de Silleda á terceira edición do concurso de decoración de Nadal.
O certame #SilledaFaiNadal contará cunha categoría individual para decorar vivendas, balcóns ou fachadas; e outra colectiva na que se poderán elixir espazos públicos. O prazo estará aberto durante todo o mes de novembro.
O obxectivo e promover a creatividade da veciñanza ao tempo que se axuda ao comercio e a hostalería local. O resultado busca “infundir un ambiente propio do Nadal en distintos espazos da vila”. As bases do certame foron aprobadas xa en Xunta de Goberno Local e establecen un reparto de premios que amplía a contía ata os 3.175 euros, (1.100 euros máis que nas edicións anteriores) .
As decoracións serán visibles dende o exterior, e estar instaladas, como mínimo dende o 15 de decembro ata o 5 de xaneiro de 2023. Admitiranse todo tipo de materiais para a construción da ornamentación e valoraranse especialmente a orixinalidade, deseño, uso de ornamentos feitos a man ou con material de refugallo, así como a interculturalidade dos decorados.
No caso de contar con iluminación, seguindo ca filosofía da decoración das rúas que se realizará este ano, xunto co CDR de Cogami en Medelo, esta será con luminarias fotovoltaicas ou de tecnoloxía LED de baixo consumo.
As bases e o anexo de inscrición estarán tamén dispoñibles na web municipal.
En cada unha das categorías establécense 3 premios, todos eles para gastar nos comercios ou nos locales de hostalería situados no municipio silledense. Na colectiva haberá un primeiro premio de 1.000 euros, un segundo de 700 e un terceiro de 500 euros. Na individual os premios serán respectivamente de 500, 300 e 175 euros. O xurado estará formado por integrantes de asociacións ou colectivos que non participen no concurso e por un representante do Concello, con voz pero sen voto, así como por un técnico municipal, que actuará como secretario/a.
