Bisbarra, 14 de novembro do 2022 – O concello de Silleda ven de iniciar os trámites para dotar ao municipio dun centro acuático e deportivo.
Silleda contará en este centro acuático cunha piscina climatizada. O primeiro paso foi obter un estudo de viabilidade onde se recollen todos os datos sobre custes, as potenciais persoas usuarias, e outros parámetros de cara a contar con estas instalacións.
O estudo establece a dotación dun centro acuático deportivo que se construirá na zona na parcela municipal situada ao carón da planta de produción da Rede de Calor con Biomasa. O plan establece un edificio cunha superficie aproximada de 900 metros cadrados, cun coste de construción estimado en 1. 083.129 euros.
O centro acuático deportivo contará cunha piscina climatizada de 25×12 metros, así como salas técnicas e outras dous para realizar distintas actividades deportivas, ademais de vestiarios ou sala de recepción. Para atender este futuro centro, establécese a creación de 11 novos postos de traballo de forma directa.
A proximidade á Rede de Calor con biomasa permitirá ademais reducir ao 50% o custe do consumo enerxético da instalación. “Como sempre dixemos , a nosa Rede de Calor, pioneira en Galicia, vai a facer máis viable esta instalación, pola que Silleda leva anos agardando, e que permitirá a veciñanza de Silleda e outras zonas limítrofes dispoñer deste servizo, moi demandando”, indica o alcalde, Manuel Cuiña.
O estudo establece un número de potenciais usuarios que se sitúa en 1.077 persoas ao ano, tendo en conta ademais a realización de cursos de natación, a maiores do servizo para o público en xeral, fixando ademais taxas e bonos para as persoas usuarias.
Construción e xestión
Para a consecución da piscina climatizada e o centro deportivo usarase unha fórmula combinada de construción e xestión, que sairían a concurso por un prazo estimado de 40 anos.
“Utilizaríase unha fórmula similar a que se realizou ca Residencia de Maiores de Silleda”, indica o alcalde, Manuel Cuiña, “o que nos permitiría contar con este servizo a través do contrato de concesión”, engade. Unha vez realizado o estudo, no que se estivo a traballar durante os últimos meses, o seguinte paso será a elaboración dos pregos para poder licitar esta actuación.
“A piscina climatizada é unha das actuacións máis agardadas e demandadas pola veciñanza. Silleda mellorará considerablemente os seus servizos cando esta dotación, para a que xa se deu un paso moi importante con este estudo de viabilidade, abra a súas portas”, indica Cuiña.