Carboeiro acolle o vindeiro venres día 12 o espectáculo Suit(e), unha creación de Millán Abeledo e Nuria Sotelo que une danza e violoncello
O vindeiro venres día 12 de setembro ás 20:00 horas, o Mosteiro de Carboeiro converterase nun escenario de encontro entre danza e música coa presentación de Suit(e), unha proposta artística que mestura a intensidade da danza contemporánea coa forza expresiva do violoncello, da man do músico silledense Millán Abeledo e a bailarina Nuria Sotelo.
Suit(e) integra composicións de Johann Sebastian Bach con obras de referencia para violoncello de Gaspar Cassadó, György Ligeti, Henri Dutilleux ou Benjamin Britten, así como unha peza específica do compositor Manuel López, concibida para este proxecto.
Este traballo naceu dunha residencia artística de catro meses que culminou coa súa estrea no Auditorio de Galicia de Santiago de Compostela o pasado 29 de abril, dentro do Ciclo de Músicas Contemporáneas.
O espectáculo enmárcase no IV Ciclo de Artes Vivas de Mediación e Exhibición, organizado coa colaboración da Xunta de Galicia, a través da Axencia Galega das Industrias Culturais (AGADIC), e coa colaboración do Concello de Silleda.
A actividade é aberta a todos os públicos, convidando á cidadanía a descubrir a forza da creación contemporánea nun espazo único como é o Mosteiro de Carboeiro.
Millán Abeledo, violoncellista silledense, forma parte desde 2014 da Real Filharmonía de Galicia. Compaxina a súa actividade orquestral coa docencia, a música de cámara e a divulgación, colaborando en diversas formacións.
Nuria Sotelo é bailarina, coreógrafa e directora artística da compañía Furia Sotelo, con ampla traxectoria en proxectos escénicos, sociais e comunitarios. O seu traballo foi recoñecido con premios como o Certame Coreográfico de Madrid ou o Premio de Interpretación Maruja Villanueva.
