Bisbarra, 15 de setembro do 2023 – O concello de Silleda presentará alegacións contra aliña de alta tensión, LAT, prevista para os proxectos eólicos de Outeiro Grande e Monte Festeiros.
Estes parques eólicos afectarían aos concellos de Silleda, A Estrada e Forcarei. Nas alegacións o Concello de Silleda defende que a LAT remate na subestación de Beariz.
Por unha banda Silleda considera que non se pode aprobar a utilidade pública do proxecto en base a utilidade social da enerxía xa que unha cousa é a enerxía e outra a infraestrutura. O goberno municipal critica ademais que se use esa utilidade pública para a “expropiación forzosa dos bens e dereitos necesarios para o seu establecemento e da imposición e exercicio da servidume de paso”.
Por outra banda nas alegacións faise referencia aos lugares de paso elixido e dise que no caso de Silleda a LAT proxectada, non discorren por zonas de montaña que non teñen outros recursos nin opcións de desenvolvemento como se explica na documentación “todo o contrario, o territorio dispón de recursos e posibilidades de desenvolvemento”.
O concello tamén fai referencia ao Decreto 19/2011, no que se ordenan os tendidos eléctricos. Existe a obriga de que existindo unha liña sexa desdobrada antes que a construción dunha nova. Cando iso non sexa posible instalarase a nova LAT o máis preto posible da existente e en paralelo. A liña proxectada non acata estes criterios recollidos na Lei de Ordenación do territorio.
A última batería de alegacións van dirixidas contra os presuntos beneficios da LAT e a vontade de potenciar ao concello. Desde o equipo de goberno explícase que “a infraestrutura de transporte proxectada, polo menos no ámbito territorial do municipio de Silleda, non parece que busque potenciar os seus elementos identitarios e diferenciadores, e ante o rexeitamento social manifesto, tampouco se estima que reforce e potencie o benestar colectivo”.
Silleda remata o documento de alegacións pedindo “o rexeitamento do Proxecto de Interese Autonómico para a Solución de evacuación conxunta dos parques eólicos de Outeiro Grande e Monte Festeiros”.
Ao mesmo tempo solicita que se proceda á modificación do trazado da infraestrutura de transporte en favor de avaliar a alternativa que se presenta, dirección sur cara SEC Paraño.
