A PLataforma recibindo o galardón
Bisbarra, 31 de xullo do 2018 – A Plataforma Minade de Touro O Pino NON segue recollendo apoios e premios xa que veñen de recibir o galardón pola Defensa e Conservación do Medio Ambiente que entrega a Fundación Insua dos Poetas ao tempo que os plenos de Silleda e A Baña aproban o apoio as súas reivindicacións.
Dous concellos máis súmanse aos múltiples apoios cos que conta a Plataforma, Silleda e A Baña. No caso de Silleda foi o Psoe por medio do alcalde, Manuel Cuíña, o que presentou unha moción aprobada por unanimidade. Poucas horas despois o pleno de A Baña apoiaba tamén a iniciativa presentada en este caso polo concelleiro Cesar Ramos de Compromiso x Galicia. Son, a día de hoxe, 37 concellos e as Deputacións da Coruña e Pontevedra as institucións que de xeito oficial rexeitan o comprometido proxecto, a unhas semanas de que se cumpra un ano da súa publicación no DOG.
Premio pola defensa do medio ambiente
A Plataforma Veciñal Mina Touro – O Pino NON ven ademais de recibir, durante a celebración da X Festa da Palabra no Carballiño, o recoñecemento pola Defensa e Conservación do Medio Ambiente que outorga a Fundación Ínsua dos Poetas, nunha edición que homenaxeaba a figura de Víctor Campio. Isabel García, da plataforma, quixo compartir o premio coas veciñas e veciños de Touro e O Pino pero tamén con “todas aquelas persoas que se ven nunha situación similar coa que nós nos atopamos”. Aproveitou, mentres recollía o galardón, para salientar o traballo e compañeirismo da Plataforma en Defensa da Ría de Arousa e das máis de 140 asociacións e as xa 39 institucións que apoian á plataforma no seu rexeitamento da megamina de cobre a ceo aberto nos municipios coruñeses. No acto estaban presentes Román Rodríguez, conselleiro de Cultura e Manuel Baltar, presidente da Deputación de Ourense.
