Compostela, 13 de decembro do 2022 – Sés volve a Compostela este sábado para presentar o seu novo disco “Diante un Eco”, o oitavo traballo en 11 anos de carreira.
Sés actuará no Auditorio de Galicia ás oito e media da tarde. Esta xira conta co apoio da Xunta de Galicia, dentro do Programa Operativo FEDER Galicia 2014-2020, e está financiada pola Unión Europea, a través do Fondo Europeo de Desenvolvemento Rexional (FEDER), como parte das respostas da Unión Europea á pandemia da covid-19.
A cantautora galega explica que “Diante dun eco” é “o eco dun pasado tráxico, da volta aos totalitarismos, da lousa dunha profunda e crecente desigualdade social, dos retrocesos en igualdade de xénero”. Unhas lacras contra as que loitou desde o primeiro disco e que once anos despois seguen a estar presentes na sociedade.
Sés volve a facer da súa voz un altofalante para denunciar todo aquelo que non debería ser, sempre dende a estética popular da que se sinte “amante e debedora”. A artista di que “Cando fago unha canción canto sobre a miña verdade e desde esa verdade constrúo un discurso lírico que chama á lucidez e a unha conduta crítica para construír unha sociedade e un futuro mellores para as nosas nenas e nenos”.
Para presentar “Diante un Eco” acompañada de toda a súa banda Sés volve aos escenarios nunha xira que a levará por Galicia, España e Latinoamérica. Ademais do de Santiago xa están programados concertos para xaneiro en Lugo o 14, Ourense o 21, Vigo o 28 e Narón o 3 de febreiro e Ponferrada o 15 de abril.