O alcalde de Brión, Pablo Lago, e a deputada responsable de Infraestruturas Viarias e Obras Provinciais da Deputación, Mónica Rodríguez, reuníronse para planificar a construción da senda peonil na DP-1302 ao seu paso por Mourentáns.
Un encontro, no que tamén participaron os técnicos provinciais e municipais, no que se acordou que a Deputación presentará en marzo o borrador do proxecto desta obra, co obxectivo de que os traballos poidan licitarse e comezar o antes posible.
Pablo Lago confirmou que o Concello de Brión conta cos terreos precisos para a execución das obras, grazas ás cesións negociadas cos propietarios ao longo dos últimos meses. “Os veciños e veciñas de Mourentáns son conscientes da necesidade destas obras xa que estamos falando dun tramo cun tráfico de vehículos moi intenso e onde a xente non dispón case nin de beiravías polas que camiñar”.
Unha necesidade que coñece ben Mónica Rodríguez, quen xa visitara a zona en 2023. Agora concretouse que as beirarrúas se executarán ao longo de 950 metros, entre os puntos quilométricos 3+215 e 4+074 da DP-1302 Negreira-Urdilde ao seu paso pola aldea brionesa de Mourentáns.
Esta reunión repetirase nas próximas semanas, momento no que a Deputación Provincial presentará ao Concello de Brión o borrador do proxecto e no que tamén se coñecerá o orzamento preciso para o seu desenvolvemento.
Despois será o ente provincial o encargado de elaborar o proxecto e licitar as obras para que poidan realizarse o antes posible. O alcalde brionés agarda que as obras poidan saír adiante o antes posible xa que se trata dunha actuación que acumula moito retraso.
Lago explicou que “Levamos reclamando esta actuación dende o 2021. Cinco anos de reunións, de visitas e de moito insistir porque é algo moi necesario”, O alcalde engadiu “esperemos que desta vez sexa a definitiva e aproveito tamén para pedirlle desculpas á veciñanza de Mourentáns por este tempo de agarda, sobre todo cando eles foron os primeiros en amosar a súa boa disposición a colaborar coa cesión dos terreos precisos para acometer esta actuación”.
DP-1301
Por outra banda, o alcalde brionés aproveitou para dar traslado da necesidade doutras dúas actuacións solicitadas en abril de 2024 ao presidente da Deputación da Coruña na DP-1301 A Gándara-Amañecida e que aínda non se puxeron en marcha.
A primeira delas é o remate das obras de ancheamento no tramo entre A Luaña e Nináns, toda vez que o ente provincial xa ten intervido en varios tramos desta mesma estrada. Trátase dun tramo moi estreito que quedou ente outros dous camiños ancheados nos últimos anos.
A segunda petición foi a mellora da seguridade nesa mesma estrada DP-1301, concretamente dende Liñares ata Gronzo, por ser un viario moi transitado, con moitas curvas e que é moi estreito. “É algo que levamos negociando dende a ampliación da ponte de Liñares e que é moi precisa para humanizar un núcleo como Gronzo, que está a medrar e ten unha estrada tan estreita e transitada que ás veces non hai espazo nin para cruzar dous coches”.
A Deputación xa investira en 2020 case 115.000 euros na mellora do trazado da DP-1301 Gándara-Amañecida, en concreto entre os puntos quilométricos 0,047 e 0,377, onde ampliou unha ponte sobre o río Viceso e que permiten que a veciñanza teña un camiño seguro ata o núcleo de Os Ánxeles, que concentra gran parte dos servizos e equipamentos tales como a gardería, a zona comercial, as paradas do transporte metropolitano e a hostalería local.
