Imaxe das non adscritas que apoiaron a moción de confianza que permitiu apoiar os orzamentos
Compostela, 30/03/2026 – A semana aparecía con nubes no Pazo de Raxoi en Compostela. Ao remate de estes días parece que o bipartito de Compostela Aberta e BNG poderá marchar de Semana Santa sen penitencia.
A alcaldesa daba unha rolda de prensa o venres na que se mostraba contenta polos temas resoltos nos últimos días. O principal a aprobación inicial dos orzamentos ao superar a cuestión de confianza.
O apoio dos non adscritos evitou que a aprobación se retrasara máis do necesario. A non adscrita Mercedes Rosón era moi clara “A decisión era enredar ou ir de cara, e nós fomos de cara” engadindo que de non prosperar a cuestión de confianza abriríase un mes para presentar unha moción de censura “que está descartada”.
O voto foi moi criticado desde o grupo socialista que os acusou de “contradicións”. Rosón tamén contestou a estas consideracións de Aitor Bouza explicando que para contradición a súa xa que o rexedor de Ames, Blas García. (socialista como Aitor Bouza) as felicitara.
Traballo que avanza
Máis alá da aprobación inicial dos orzamentos a alcaldesa, Goretti Sanmarrtín, destacaba da semana o desbloqueo da parcela de Peleteiro, a aprobación do regulamento do Foro de Turismo Sustentable ou o regulamento da vivenda para persoas sen fogar.
Sanmartín reivindicou unha vez máis o proxecto de Peleteiro “que logrou combinar os obxectivos que se marcaran para a parcela de Peleteiro: un espazo urbano de calidade con equipamentos e vivenda pública; de aumentalos, cunha maior reserva de vivenda protexida no planeamento cun acordo para que se materialice como vivenda pública; e coa garantía de que non se instale unha gran superficie comercial”.
Outro tema que destacou foi a recuperación do proxecto “dun verdadeiro centro integral ás persoas sen fogar”. A rexedora non perdeu tampouco oportunidade de defender os novos pasos na licitación do ciclo integral da auga despois da sucesivas situacións que se deron no proceso.
Sentenza favorable
Saíndo xa do aprobado, a alcaldesa deu conta dunha sentenza xudicial favorable aos intereses municipais, que confirma o acordo adoptado en novembro de 2023 no Pleno municipal a respecto dun recurso presentado por TRALUSA.
A empresa prestadora do servizo de transporte urbano consideraba que non se lle tiña que penalizar por non alcanzar o número de persoas usuarias comprometido argumentando que a causa fora a pandemia.
Segundo a oferta da adxudicataria do servizo, actualizada en 2022, a cifra de persoas viaxeiras que debía alcanzar era de 7.403.234 e só se chegou a 6.095.595. De acordo con isto, aplicouse unha penalización de 764.054.28 euros contra a que a empresa prestadora do servizo do transporte presentou o recurso contencioso que acaba de sentenciarse.
A resolución dálle a razón ao Concello e confirma que este desconto foi correctamente aplicado. “É unha máis de moitas sentenzas favorables, nas que temos que agradecer o traballo dos servizos xurídicos municipais”, apuntou a rexedora que lembrou tamén a recente inadmisión do recurso contencioso-administrativo presentado polo PP que cuestionaba a posibilidade de acumular os puntos de debate nos plenos cando estes están relacionados.
