As organizacións sindicais dos tres sectores de atención á discapacidade en Galicia (CIG-Ensino, CCOO Ensino, UGT, USO, CUT e SNEP) denuncian a actitude da Conselleira de Política Social, Fabiola García, quen “ningunea aos axentes sociais ao non responder á solicitude de xuntanza para debater sobre cuestións cruciais para os servizos sociais”.
Denuncia que se trata dunha práctica habitual da Consellería de Política Social, non recibir aos representantes das persoas traballadoras e das persoas usuarias para abordar temas tan importantes como a dignificación salarial, a mellora de ratios e a dotación de recursos nos sectores de discapacidade, menores e infantil 0-3.
Para os sindicatos isto “demostra unha falta de respecto pola negociación colectiva e polo benestar dos traballadores e traballadoras, así como das persoas ás que atenden”. Ante a negativa a reunirse e dialogar sobre melloras en estes ámbitos e “esgotado o prazo de dez días dado pola representación sindical, as organizacións sindicais retomaremos as mobilizacións”.
As organizacións advirten á Consellería de Política Social de que a primeira convocatoria de mobilización terá lugar o vindeiro xoves, 18 de decembro. Unha concentración de delegados/as dos tres sectores, ás 10:30, diante da Xunta de Galicia, en San Caetano.
O obxectivo é esixir que se abra unha vía de diálogo e se dean pasos reais para mellorar as condicións laborais, sociais e salariais, así como a calidade dos servizos. Engaden que “a responsabilidade de que o conflito se agrave é, única e exclusivamente, da Xunta de Galicia pola súa actitude de peche e desprezo á unidade de acción sindical así como a todo o persoal traballador representado”.
