Compostela, 21 de novembro do 2023 – O goberno municipal de Santiago enviou unha notificación á Sareb no pasado mes de outubro advertindo de que o proxecto presentado para Peleteiro non cumpre a actual normativa da cidade.
Tras o remate da lexislatura anterior sen acordo a Sareb, o coñecido como “banco malo”, presentou unha solicitude de licencia para desenvolver o chan de Peleteiro a partir do proxecto orixinal. Dito proxecto contempla un centro comercial e 40 apartamentos turísticos.
Ao remate da Xunta de Goberno semanal a alcaldesa , Goretti Sanmartín, explicaba a preguntas dos xornalistas que o proxecto presentado non cumpre a normativa actual, moi restrictiva en canto a centros comerciais. Sanmartín engadía que en calquera caso o diálogo é constante cos propietarios.
Parte da negociación de investidura
Segundo puído saber Lindeiros, a parcela de Peleteiro foi un dos moitos temas tocados polo BNG na negociación para a investidura de Pedro Sánchez. O goberno de Goretti Sanmartín é partidario de que a Sareb ceda a parcela dentro dos plans do goberno central para uso de espazos públicos para vivenda, presentados durante a campaña. Finalmente a idea quedou fora dos acordos co goberno socialista pero as conversas coa Sareb mantéñense e o goberno municipal non descarta acordos que aparten definitivamente a ameaza de máis superficie comercial ou vivendas turísticas no Ensanche.
