Compostela, 27 de decembro do 2023 – A asociación de comerciantes do Ensanche, Santiago Centro, celebra este ano o Nadal cunha nova campaña na que é protagonista a súa aplicación de fidelización, Santiago Centro Vip.
O Centro Comercial Aberto sorteará 50 bonos de 50€ en saldo para a app entre as compras que se rexistren na mesma entre o antes do 5 de xaneiro. A iniciativa conta coa colaboración da Xunta de Galicia e da Deputación da Coruña.
Para participar só é necesario descargar gratuitamente a aplicación, dispoñible tanto para dispositivos iOS como para Android, e rexistrar un usuario. Unha vez o cliente ten creado e activado o seu perfil, só ten que escanear co móbil o código QR que se mostra no establecemento adherido no que merque, para que a compra quede rexistrada.
Por cada compra superior aos 10€ entrará no sorteo dos 50 bonos de 50€, que se realizará pasado o día de Reis. Na propia app atópase unha listaxe das tendas nas que pode utilizarse Santiago Centro Vip. Cantas máis compras se rexistren, máis posibilidades existen de conseguir un dos bonos.
Todos os sectores representados
A campaña quere servir como aliciente para que o público visite os establecementos do Ensanche de Santiago nunhas datas fundamentais para o comercio de proximidade. A través da aplicación Santiago Centro VIP pódese acceder a descontos e ofertas e acumular vantaxes en establecementos de moda, calzado, roupa infantil, deporte, óptica, papelería, alimentación, electrodomésticos, complementos e, por suposto, agasallos para o Nadal.
Máis información sobre as bases do sorteo no seguinte enlace.
