Santa Comba, 4/03/2026 – Aínda faltan uns meses pero todos os concellos teñen a mirada posta no eclipse de sol do mes de agosto. Santa Comba non é unha excepción e súmase a Arzúa no traballo de preparar unha xornada especial en esa data.
O 12 de agosto o Monte San Bartolomeu acollerá esta cita tan especial. Unha data na que coinciden
un eclipse solar e a chuvia de estrelas das Perseidas (Bágoas de San Lourenzo). A concelleira de Turismo, Noelia Baleato Toja, xunto co técnico municipal José Manuel Vázquez, mantivo unha reunión de coordinación co profesor José Ángel Docobo, catedrático de Astronomía da Universidade de Santiago de Compostela e coordinador científico do Observatorio Astronómico Ramón María Aller, entidade que colaborará activamente no desenvolvemento da cita.
A implicación directa do Observatorio Astronómico Ramón María Aller e da Universidade de Santiago de Compostela supón un respaldo científico de primeiro nivel para Santa Comba. Trátase dunha colaboración puntual e altamente cualificada, que non se estende de maneira habitual a numerosos municipios, polo que o Concello valora de maneira especial dispor da data reservada na axenda do equipo investigador para a celebración deste evento.
Unha aposta consolidada pola astronomía
Santa Comba leva anos desenvolvendo unha estratexia sostida arredor da astronomía e da divulgación científica. Foi un dos primeiros concellos galegos en impulsar programas específicos como TodoCosmos, orientados á aproximación da ciencia á veciñanza, e consolidou a xa coñecida Ruta das Perseidas, que cada verán reúne centos de persoas na contorna da Capela de San Bartolomeu.
Esta traxectoria continuada explica que o municipio conte hoxe cunha programación estable neste ámbito e cun recoñecemento crecente como espazo axeitado para a observación astronómica.
O Monte de San Bartolomeu presenta características idóneas para a observación: orientación panorámica de 360 graos e baixos niveis de contaminación lumínica.
Estas condicións permitirán seguir o eclipse solar coas debidas medidas de protección e, posteriormente, a observación das Perseidas e das principais constelacións de verán. A xornada terá carácter divulgativo e familiar, combinando explicacións científicas, observación guiada e actividades complementarias. O Concello dará a coñecer nas próximas semanas o programa detallado e as recomendacións técnicas para garantir unha asistencia segura.
