As veces pódese pensar que os concellos teñen liberdade para gastar sen límite pero a xestión económica dun concello é fundamental. O de Santa Comba nas eleccións do 2023 debía 2,8 millóns de euros.
Unha cantidade como esta supón que moitos servizos, pequenos comercios e empresas que traballan para o concello ou mesmo autónomos estean sen cobrar. A débeda pode tamén derivar en sancións ou xuízos que supoñan pagar xuros a maiores.
Santa Comba ven de facer un esforzo de aforro que reduciu a débeda municipal en 1,6 millóns de euros. Aínda así quedan pendentes 1,21 millóns o que da unha idea da situación económica na que se atopaba o concello.
Estas cifras corresponden á conta xeral do ano 2024, aprobada no pleno municipal. O alcalde de Santa Comba, Alberto Romar, dicía que “O benestar da veciñanza ten que estar por riba dos partidos políticos e traspasar lexislaturas. Grazas a unha boa xestión económica, reducimos a débeda do Concello en 1,6 millóns de euros, o que nos permite seguir estabilizando as contas municipais”.
Alberto Romar é moi crítico coa actuación da súa predecesora no cargo e considera que “entidades supramunicipais deberían vixiar” a actuacións dos concellos, sobre todo en anos electorais. “O acontecido en Santa Comba no ano 2023 é moi grave, gastar moi por riba do orzamento real para gañar unhas eleccións tiña que estar vixiado e prohibido ”.
O alcalde tamén critica que na Comisión Especial de Contas celebrada o pasado 2 de xaneiro, na que se analizou a conta xeral de 2024, só estiveran presentes os tres representantes do PSdeG, Carlos Turnes, Pablo Negreira e Alberto Romar, que preside a comisión, e un do PP. “Polo Partido Popular so acudiu Rafael Liñares, “mentres que a ex alcaldesa, María Pose, ausentouse da comisión sen aviso nin xustificación”, asegura Romar.
