Bisbarra, 21 de outubro do 2024 – O Servizo de Axuda no Fogar, (SAF) estase a converter nun problema moi serio para os concellos, a demanda crece ano a ano e os recursos non suben no mesma proporción.
Santa Comba leva meses negociando cos traballadores para atopar un equilibro entre os dereitos dos empregad@s do SAF e as necesidades do servizo. As condicións son precarias desde hai anos e o equipo de goberno, saído das últimas municipais, trata de negociar cos representantes sindicais unhas condicións que convenzan a todos.
Desde o concello explícase que “tras continuas reunións e intentos de acordo tanto en xuntanzas informais coma en mesas de negociación coas diferentes centrais sindicais, o Concello de Santa Comba vese forzado a tomar medidas para intentar mellorar unha situación xa enquistada respecto do SAF”.
As citadas reunións non conseguiron chegar a pactos que aceptaran ambas as dúas partes. En este punto o equipo de goberno decidiu “establecer quendas que respecten a xornada semanal tal como determina a normativa vixente para a administración xeral do Estado”.
A última mesa de negociación co SAF celebrouse o pasado día 18 e o consistorio presentou unha proposta para a retribución das horas extra, o tempo dos recoñecementos médicos, horario de verán, fins de semana e festivos. Unha decisión que só no mes de outubro suporá un investimento de 25.000 euros.
O concello, dada a situación. Insta á Xunta de Galicia “a que atenda na menor brevidade posible as xa numerosas solicitudes presentadas para concertar unha reunión e abordar as problemáticas, así como para que revise a súas achegas e financiamento, algo co que a institución autonómica se comprometera o pasado mes de xuño”.
A concelleira de Servizos Sociais, Estefanía Calvelo, tamén fai fincapé na necesidade de que dende as institucións autonómicas e estatais se cumpra o previsto na Lei de Dependencia para que o 100% do custo do SAF sexa asumido pola Xunta e polo Ministerio tal e como defende a FEGAMP, xa que é inviable que os concellos sigan asumindo competencias impropias que afogan economicamente e hipotecan as administracións locais incrementando o capítulo de persoal por enriba do 50% nos orzamentos.
