Bisbarra, 3 de febreiro do 2025 – Santa Comba será o primeiro concello ao que se amplíe o Festival de cine LGTBQ+ Norte Cinema Diverso.
O festival, en colaboración co concello de Santa Comba, celebrará o sábado 8 de febreiro unha xornada de cine e debate que incluirá a proxección da película “Te estoy amando locamente” e un coloquio posterior coa participación dos codirectores do certame, Fernando Cayazzo e Fito Ferreiro.
A concelleira de Cultura e Educación de Santa Comba, Patricia Val, dixo sentirse tremendamente orgullosa e engadiu que “Esta iniciativa alíñase cos nosos valores. O cine transmite mensaxes que son vitais para a nosa sociedade: inclusión, diversidade e formación persoal a través dos referentes do propio cine. Agardamos que esta rede, que imos conformando concellos, asociacións e persoas, siga medrando cada ano para crear alianzas e espazos amigos para a comunidade LGTBIQ+”
A película dirixida por Alejandro Marín e protagonizada por Omar Banana, Ana Wagener, La Dani e Alba Flores, foi finalista en cinco categorías dos Premios Goya en 2024. A cinta recolle os inicios do movemento LGTBIQ+ en España tras a morte do ditador Francisco Franco. Na súa banda sonora figura o tema “Yo solo quiero amor” de Rigoberta Bandini, Goya á mellor canción orixinal.
A entrada ao auditorio do Multiusos de Santa Comba será de balde ata completar aforo. “Parécenos moi importante que se mostren as realidades LGTBIQ+ máis alá das cidades. Existimos en todos os lugares. Norte Cinema Diverso é unha celebración do cine, pero unha celebración reivindicativa na que poñemos o foco en axudar a visibilizar o colectivo a través da sétima arte”, comenta Fernando Cayazzo. A proxección empezará ás 20:30 horas.
O festival Norte Cinema Diverso chega este ano á terceira edición. Celebrarase no Teatro Colón da Coruña do 20 ao 22 de febreiro.
