Bisbarra, 21 de setembro do 2023 – O ex director xeral de Minas da Xunta, Ángel Bernardo Tahoces, prestará hoxe declaración nun xulgado de Santiago por presuntas irregularidades na mina de San Finx
Tahoces, xunto con dous funcionarios ao seu cargo, terían asinado presuntamente informes con falsidades en relación ás presas mineiras abandonadas e á contaminación existente en San Finx. A Confradía de Noia está acudida noutras dúas causas penais contra funcionarios e altos cargos de Augas de Galicia e contra a propia empresa mineira australiana.
No mesmo auto chámase aos outros imputados no caso, o xefe do servizo de enerxía e minas na Coruña e un dos funcionarios do mesmo departamento. Todos eles terán que presentarse nos xulgados composteláns por unha causa penal na que están acudidas como acusación popular a Confradía de Pescadores de Noia, Ecoloxistas en Acción e Verdegaia.
Os informes pretendían presuntamente beneficiar a empresa concesionaria tentando facer pasar a presa de residuos mineiros de San Finx como parte das instalacións dunha central hidroeléctrica inexistente. un ano máis tarde a relacionaron cun muíño de millo. Isto a pesar de que a presa de formigón, de 50 metros de largo e 14 de alto, construída pola empresa mineira en 1939 como depósito de lodos, apareceu nos plans oficiais de labores ata que se deixaron de presentar no ano 2000.
Augas de Galicia recoñeceu que en caso de colapso os residuos mineiros almacenados causarían un importante impacto ambiental augas abaixo, estando a tan só 7 km da ría de Noia. Evitando recoñecer que se trataba dunha presa de residuos mineiros os imputados terían tentado evitar as responsabilidades da empresa concesionaria, que tería que facer fronte a unha restauración valorada en varios millóns de euros, e danos multimillonarios en caso de colapso e afectación ás zonas de marisqueo na ría.
Tahoces e os mesmos funcionarios tentaron presuntamente de ocultar a existencia da contaminación con metais pesados, apoiando o argumento falso da empresa de que os altos niveis de elementos tóxicos terían orixinais, e insistiron unha e outra vez que non era necesario someter o proxecto a unha avaliación de impacto ambiental, algo que a propia Xunta acabou recoñecendo que era imprescindible para a continuidade da explotación.
Este non é a única causa penal que afecta as minas de San Finx, unha vez que en paralelo a Confradía de Noia está igualmente acudida como acusación popular noutra causa dos xulgados de Santiago contra catro funcionarios e altos cargos de Augas de Galicia por malversación, prevaricación e falsidade, así como nun proceso por delitos medioambientais que se instrúe nos xulgados de Noia contra a empresa mineira e os seus directivos australianos.
