Padrón, 9 de febreiro do 2022 – Durante moitos anos esquecida, Rosalía de Castro é agora reivindicada por todos ata o punto de centrar máis dunha programación en Padrón.
Febreiro é o mes de Rosalía e desde este ano o día 23 o seu día. O concello de Padrón propón un intenso programa cultural arredor da poetisa. Ao mesmo tempo o BNG ofrece unha serie de actividades baixo o nome de Rosalía rebelde.
Unha Rosalía Rebelde
O Bloque Nacionalista Galego celebra este mes como “Mes de Rosalía mes de Rebeldía” según o cartaz que anuncia distintos actos. O primeiro deles na Casa dos Capeláns de Padrón, unha palestra sobre “A rebeldía de Rosalía” a cargo de Francisco Rodríguez e con música de Aires de Compostela.
O día 19 realizan un roteiro ata a Casa de Rosalía que sairá as dez da mañá estatua de osalía no Espolón. Ten un prezo de 3 euros e no caso de cubrirse todas as prazas repetirase o día 26.
O úlitmo evento terá lugar o día 20 na Igrexa de Bastavales, en Brión. As doce do mediodía os Quinquilláns representarán “A pluma de Rosalía”.
Unha Rosalía institucional
O Concello de Padrón celebrará o Día de Rosalía o 23 de febreiro coincidindo coa data real do seu nacemento segundo as últimas investigacións. Abrirase as dez da mañá coa tradicional ofrenda floral na estatua do paseo do Espolón. O grupo de gaitas Os Carapaus poñerá o acompañamento musical, mentres o alumnado do IES Camilo José Cela lerá varios poemas da escritora. Nenas e nenos dos colexios e institutos de Padrón sumaranse tamén á celebración plantando un fillo da figueira da casa de Rosalía nos seus centros.
Xa pola tarde, ás 16.30 horas, o xardín botánico acollerá as Terturlias clandestinas con Rosalía, unha conversa entre o locutor de radio José Manuel García e a guía turística María Chamadoira, que lle dará vida a Rosalía para descubrirnos fitos imporantes e as facetas máis descoñecidas da súa vida. A música a porá a artista de Bastavales Fátima Pego. A entrada será gratuíta pero haberá que reservar praza na oficina de Turismo de Padrón.
A xornada pecharase coa presentación do libro ‘O sal dos días’ de Rafael Xesús Vidal, gañador da oitava edición do certame poético Rosalía de Castro. O acto desenvolverase no Auditorio Municipal a partir das 19.00 horas e rematará co concerto de Xisco Feijóo. As persoas interesadas en asistir a este concerto deberán retirar a invitación no Centro Social a partir do luns 14 de febreiro.
Os actos na honra de Rosalía de Castro esténdense máis alá da data de aniversario da escritora galega máis universal. Cabe lembrar que na praza Ramón Tojo pode visitarse ata o 24 de febreiro a mostra que conmemora os 50 anos do museo da Casa de Rosalía. Os eventos, pola súa banda, iniciaranse o venres 18 coa presentarase no Auditorio do libro ilustrado ‘O sombreiro de Murga’, de Manuel Lorenzo Baleirón, mentres que o sábado 19 Teatro do Atlántico representará tamén no Auditorio ‘Libre como os paxaros’, obra baseada en textos de Rosalía.
Nenas e nenos dos centros de educación infantil participarán da celebración os días 21, 22 e 25 asistindo ao espectáculo de contacontos ‘Figueiriñas que eu prantei’ de Correo do Vento e o alumnado de 5º e 6º dos colexios Flavia e Rosalía de Castro poderán ver ‘Rosalía’, proposta teatral de Culturactiva, o venres 25.
Padrón pechará a programación do Mes de Rosalía o sábado 26 con música. Ao mediodía, a Banda Municipal presentará no Xardín Botánico a peza Caldo de Gloria, composta por Loliña Mosquera e Braulio Cao, e pola tarde chegará á súa terceira edición a Gala Rosalía Foliadeira, organizada pola Asociación Cultural Rosalía de Castro. A cita queda fixada para as 19.30 horas no Auditorio.
