Bisbarra, 9 de novembro do 2022 – Rois celebrou o pleno ordinario de novembro con abundantes temas sobre a mesa e varias mocións da oposición.
No pleno quedou ratificado o padrón de habitantes que a 1 de xaneiro era de 4.445 veciños. No 2021 Rois tivo 140 e 186 baixas no censo. O BNG pediu medidas para incentivar o empadronamento. Pola súa banda o PSdeG propuso actualizar o PXOM para facilitar a construción de vivenda.
O alcalde, Ramón Tojo, destacou o alto número de nacementos, os moitos servizos que ofrece o Concello á veciñanza e as vías de comunicación que conectan Rois coa comarca e con outros puntos de Galicia, como medidas que axudarán a recuperar poboación.
Propostas da oposición
O grupo socialista propuxo bonificar o Imposto de Bens Inmobles (IBI) das explotacións agropecuarias. O equipo de goberno do PP rexeitou a moción indicando que se está apoiando ao sector primario coa mellora de infraestruturas e servizos, ademais de destacar que Rois aplica o mínimo legal do 0,40% no recibo da contribución. Os socialistas responderon que “resulta incomprensible que o PP este a favor de rebaixas de impostos como o iva (de carácter indiscriminado) e sen embargo rexeite unha bonificación do IBI especifica sobre un sector concreto (que previamente s corporación debe declarar de especial interese municipal) e só baixo situacións que dificulten a súa supervivencia e viabilidade”.
A iniciativa contou con 6 votos en contra do PP e 4 a favor (PSdeG e BNG).
O PP tamén rexeitou a moción do BNG solicitando máis axudas da Xunta para o CIM Terras de Iria para garantir a atención á violencia machista nun contexto de crise de prezos e repunte do machismo. A concelleira de Servizos Sociais, Mercedes Basante, lembrou o incremento da inversión feito polo goberno galego e argumentou que o Concello está moi satisfeito co funcionamento do Centro de Información á Muller. Dende que se asinou o convenio en 1995, o centro atende aos municipios de Rois, Padrón e Dodro. O alcalde concluí o punto sinalando que Rois “ten un servizo eficiente e coa labor do CIM Terras de Iria temos uns servizos exemplares”. A moción foi rexeitada cos votos en contra do PP (6) e a favor de PSdeG (3) e BNG (1).
A Corporación aprobou por unanimidade constituír o vindeiro 14 de decembro a Mesa local de coordinación interinstitucional fronte a violencia de xénero.
Tamén cos votos a favor dos tres grupos aprobouse a moción presentada polo BNG solicitándolle ao Goberno central que rebaixe o IVE da bombona de butano e máis da de propano, como medida para rebaixar a facturas enerxética ás persoas que viven no rural (actualmente a rebaixa do IVE aplícase ao gas cidade, pero non ao embotellado).
Outros temas
No capítulo de rogos e preguntas Begoña Ares (BNG) interesouse pola Festa da Xuventude, que se vai celebrar o vindeiro sábado coa actuación da Orquestra Panorama, e canto lle vai costar ao Concello. O alcalde, Ramón Tojo, respondeu que a festa organizase cos 7.000 euros de subvención que da a Deputación para reactivar o sector das orquestras o co canon do bar, “polo que o Concello terá que pagar moi pouco”.
Preguntado por que non se destinou estas axudas as comisión de festas parroquiais, Ramón Tojo explicou que cando a Deputación sacou a convocatoria, moitas parroquias xa celebraran as súas festas e, por outra banda, os requisitos esixidos na convocatoria poñíanlle moitas dificultades á moitas comisións. “Por este motivo decidimos organizar a festa dende o Concello, cunha actuación de primeiro nivel”, dixo. Ademais, o alcalde lembrou que dende o Concello xa se colabora con todas as comisións de festas a través do programa Cultura Dispersa, que leva espectáculos a todas as parroquias, ademais dunha aportación económica de 300 euros a cada comisión.
Dende o grupo socialista, en relación co PAI de Urdilde, para o que se agarda unha achega da Deputación de 80.000 euros, Manuel Regueira preguntou pola reunión do Concello co Consorcio Galego de Igualdade e Benestar, que se encarga de xestionar A Galiña Azul. O alcalde respondeu que en Urdilde vaise facer un Punto de Atención á Infancia, para facilitarlle a conciliación as familias con menores de ata 3 anos, sobre todo da zona norte do Concello.
Colaboración con gandeiro afectado pola morte das vacas
A Corporación de Rois destinou os 825 euros do pleno a colaborar co veciño de Quintás ao que lle morreron 9 vacas. Todos os concelleiros decidiron doar o importe das dietas establecidas pola asistencia ao pleno de onte para colaborar. Os integrantes da Corporación aportan 825 euros á conta solidaria aberta polo Concello, que a última hora da mañá de onte levaba recadados xa 7.000 euros.
O obxectivo é que Manuel Rodríguez Castro poida mercar novas reses, despois de que a mediados do pasado mes de outubro vise como lle morrían 9 das 14 vacas debido a unha intoxicación coa planta da que se obtén a burundanga. O 18 de outubro, o Concello abría en Abanca a conta solidaria ES49 2080 0328 9031 1000 0042 na que xa se levan recadados sete mil euros. En marcha hai outras iniciativas para axudarlle a este gandeiro da parroquia de Urdilde.
