Bisbarra, 3 de xaneiro do 2023 – O concello de Rois celebrou un pleno no que, entre outros asuntos, aprobou os plans de obras e gastos sociais da Deputación.
O POS+ 2023 da Deputación aprobouse cos votos a favor do BNG e do PP e a abstención do Psoe. Por outra banda o POS + adicional que se destina a gasto social saíu adiante por unanimidade.ç
O motivo da abstención do Psoe é que as obras aprobadas, arranxo de interiores en O Piñeiro e Seira, non contemplan o saneamento. Fan fincapé na aldea de Seira na que desde que nos anos noventa se puxeran tubos de saneamento sen decantación non se volveu a arranxar nada.
Outros temas
Ao pleno asistiu unha representación dos traballadores do Servizo de Axuda no Fogar, SAF. O alcalde, Ramón Tojo, contestou a preguntas da oposición sobre a municipalización de este servizo dicindo que “É un proceso complexo e estamos a espera de que os técnicos municipais rematen os informes pertinentes para que o SAF volva ser municipal”, dixo.
O Psoe lembrou que se trata dunha municipalización que xa no 2020 foi comprometida “sen ata o de agora se levara a cabo”
Mocións
O goberno local rexeitou a moción socialista para crear unha agrupación de Protección Civil supramunicipal cos concellos de Padrón e Dodro. O alcalde argumentou o voto en contra do PP sinalando que actualmente Dodro non ten voluntarios de protección civil e que os de Padrón non operan fóra do seu termo municipal “En Rois estamos cubertos coa presenza do Grupo de Emerxencias Supramunicipal (GEX) Terras de Iria, que opera as 24 horas, e cos voluntarios de protección civil de Rois. Non vemos factible crear unha agrupación de protección civil comarcal, porque non hai unha necesidade crecente por parte dos outros alcaldes”.
O Psoe defendeu que mancomunar o servizo permitiría unha axuda anual de maior importe ao influír o número de habitantes, un acceso a maior equipamento doado pola Xunta de Galicia e aforro nos seguros de responsabilidade civil xa que só habería que pagar un. Lembrou ademais que a caída de poboación fai necesario comezar a mancomunar servizos como xa sucede en outros lugares.
Finalmente a proposta foi rexeitada cos sete votos en contra do PP e os catro de BNG e Psoe a favor.º
