Bisbarra, 7 de marzo do 2023 – O pleno municipal de Rois ven de aprobar dúas mocións, unha do PP e outra do PSdeG, relativas á conmemoración do Día Internacional da Muller este 8 de marzo.
As dúas iniciativas recibiron o apoio unánime do Pleno. Teñen como obxectivo, aproveitando o Día da Muller, instar á Xunta e Goberno Central a insistir nas medidas para eliminar as desigualdades de xénero na sociedade.
A moción presentada polo Grupo Popular solicita da Xunta apoio ás “vocacións científicas das nenas e das mozas, principalmente desde o ámbito educativo”. Reclama do goberno autonómico a colaborar con organizacións de mulleres científicas para promover un maior coñecemento dos referentes femininos neste campo, e a proseguir coa formación do profesorado e do persoal de orientación dos centros educativos neste sentido.
Tamén por unanimidade foi aprobada a moción presentada pola edil Patricia Ces en nome do grupo municipal socialista, na que se insta á Xunta de Galicia á creación dun organismo autónomo que deseñe, impulse, avalíe, asesore e coordine as políticas de igualdade de xénero e sensibilice á sociedade galega co fin de conseguir a igualdade real e efectiva de mulleres e homes na nosa Comunidade.
Nesta mesma moción, o PSdeG insta ao Concello de Rois a corrixir a linguaxe sexista en todos os textos municipais. A este respecto, a concelleira popular Mercedes Basante aclarou que esta é unha medida que xa se está a aplicar na actualidade.
Outras mocións
O pleno de Rois votou negativamente á moción presentada por Begoña Ares, concelleira do BNG, referida ao apoio á Iniciativa Lexislativa Popular sobre medidas urxentes para recuperar e fortalecer a atención primaria. O alcalde Ramón Tojo explicou este posicionamento en contra alegando que esta iniciativa responde a un “uso partidista da sanidade”. A moción foi rexeitada cos votos en contra do PP e a favor de PSdeG e BNG.
A outra iniciativa exposta polo BNG referíase á instalación do parque eólico Marco e das infraestruturas anexas e de evacuación, así como da central hidroeléctrica de bombeo reversible do Tambre. Esta moción foi igualmente rexeitada cos votos en contra do Partido Popular.
Na primeira parte do pleno o alcalde, Ramón Tojo, deu conta dos informes de morosidade de tesouraría e de intervención correspondentes ao terceiro e o cuarto trimestres do ano 2022. Os avances en relación coa municipalización do servizo de axuda no fogar ou as axudas doutras administracións recibidas para o Punto de Atención á Infancia que se poñerá en marcha en Urdilde foron algúns dos temas tratados no apartado de rogos e preguntas.
