A actuación na escola infantil consistiu na substitución do chan da zona exterior do centro por caucho continuo e conta cunha achega da Xunta de Galicia.
O alcalde de Rois, Ramón Tojo, e o xerente do Consorcio Galego de Servizos de Igualdade e Benestar, Perfecto Rodríguez, visitaron as instalacións da escola infantil A Galiña Azul e comprobaron o resultado das obras de mellora do patio exterior.
O ente autonómico financiou con preto de 16.000 euros a substitución do caucho existente no patio da escola infantil por pavimento continuo, o que mellora a seguridade das nenas e nenos ante posibles caídas.
O concello contratou e executou os traballos, que se levaron a cabo este verán, mentres que o Consorcio se encargou de sufragalos con cargo ás liquidación pola prestación do servizo.
Estas obras forman parte das melloras realizadas durante a época estival nas escolas infantís do Consorcio de cara a acondicionalas para o regreso ás aulas, que terá lugar este venres, día 5 de setembro. Na visita ás instalacións tamén participaron a concelleira de Servizos Sociais, Mercedes Basante, e o director da escola infantil.
