Taberna O Pemento
Un ano máis Rois renderalle homenaxe a Rosalía de Castro cunha programación cultural e participativa coa vista posta no 23, Día de Rosalía. O Concello convida á veciñanza a celebrar e compartir o legado da poeta a través da música, da lectura e da tradición gastronómica.
O Caldo de gloria volverá ser un dos eixes centrais da celebración o luns, cando os establecementos hostaleiros de Rois ofrecerán esta receita inspirada no poema Miña casiña, meu lar xunto cun pousavasos conmemorativo de Rosalía.
Participan nesta iniciativa Mesón A Casiña, Café-bar A Lúa, Taberna Angueira, Hotel Camiño do Mar, Taberna Casa Benjamín, Casa rural Fogar do Selmo, Café-bar Malecón, Bar Muelle, Bar O Pemento, Club de golf Val de Rois e Taberna Venezuela.
No caso do Fogar do Selmo e O Pemento, que permanecen pechados os luns, a degustación trasladarase ao domingo 22 de febreiro, permitindo así que toda a veciñanza poida sumarse a esta homenaxe gastronómica á poeta galega máis universal.
Por outra banda, o Auditorio municipal acollerá diversas propostas culturais arredor da figura de Rosalía. O venres 20 de febreiro, A Xanela do Maxín presentará Dende Rosalía ata as cantareiras, e o sábado 21 será a quenda do concerto Cantamos con Rosalía, de Luís Vallecillo. Ambas as dúas actuacións están previstas para as 18.00 horas.
A programación de Rois con Rosalía inclúe unha visita guiada ás camelias da familia Abalo, en Oín, que terá lugar o sábado 28 de febreiro. Esta actividade, que require inscrición previa ata o 25 de febreiro no enderezo inscricions@rois.gal, permitiralles ás persoas participantes descubrir este espazo singular con centos de variedades de camelias.
A biblioteca municipal converterase tamén nun lugar de encontro coa autora, cunha exposición das adquisicións bibliográficas dedicadas á escritora e cun posadoiro temático que estará dispoñible desde o 20 de febreiro ata final de mes.
A celebración terá unha forte presenza nas redes sociais. Entre o 20 e o 27 de febreiro, as persoas que publiquen contidos relacionados con Rosalía acompañados dos cancelos #RoisconRosalía e #DíadeRosalía participarán no sorteo de dous lotes de produtos elaborados por AMIPA, cun sorteo en Facebook e outro en Instagram.
Como parte desta homenaxe colectiva, o Concello repartirá cadernos de Rosalía nos establecementos de Rois adheridos á campaña Caldo de gloria e nas diferentes actividades. Distribuirá tamén manteis conmemorativos nos centros educativos CPI Os Dices-Rois, CPPI O Pumar-Urdilde e A Galiña Azul, así como na asociación AMIPA e no Centro de Día de Urdilde.
O Concello de Rois anima a toda a veciñanza a participar nesta programación para celebrar en comunidade o Día de Rosalía e manter vivo o seu legado literario e cultural. A iniciativa conta coa colaboración da Xunta de Galicia, da Deputación da Coruña a través da Rede Cultural e da Casa de Rosalía.
