Rois, 28 de maio do 2021 – O concello de Rois reclama á Deputación o arranxo dunha estrada que está pendente dunha decisión da Dirección Xeral de Patrimonio.
Trátase da estrada DP-7402 de Martelo ata Augasantas. O concello de Rois reclama que sexa ampliada pero o proxecto da deputación está paralizada por un informe negativo da Xunta de Galicia por un xacemento de mámoas entre Salgueiros e O Codeso.
Visitas ao lugar
Na tarde do mércores o Deputado Provincial, e alcalde de Ames, Blas García e o concelleiro socialista Manuel Regueira visitaron a estrada para buscar posibles solucións á paralización derivada do informe da Dirección Xeral de Patrimonio. Un proxecto aprobado en abril do 2019 cun orzamento de 1.233.924 euros.
Onte xoves era o alcalde de Rois, Ramón Tojo, e o Deputado Provincial do Partido Popular Evaristo Ben, os que se reunían cos veciños para explicar que presentarán no Pleno da Deputación un rogo para o arranxo da estrada.
Malestar socialista
O grupo socialista manifestaba o seu malestar na súa páxina de Facebook polas publicacións na web do concello de Rois reclamando a ampliación. Entenden que se está a facer un uso partidista da web municipal e recriminan que non se dea toda a información dando a entender que o retraso e responsabilidade exclusiva da Deputación.
