Coruña, 6/05/2026 – O Profesor García Mira, que foi recentemente nomeado Catedrático Emérito polo Consello de Goberno da Universidade da Coruña, ven de ser distinguido coa Cátedra Honoraria “Ching-Ching Hung-Dao” da universidade Estatal Tsing Hua.
Financiada pola Fundación que leva o mesmo nome, esta cátedra foi deseñada para recoñecer a excelencia en investigación, docencia e prestixio internacional, e ao mesmo tempo atraer ou reter talento académico.
No contexto da NTHU, esta distinción é promovida polo College of Education e polo Departamento de Recursos Ambientais e Culturais, concédese ao Profesor García Mira como proba de recoñecemento institucional, académico e científico polos destacados traballos de colaboración internacional e o seu impacto académico e científico no ámbito da aplicación da psicoloxía á educación.
A denominación “Ching-Ching Hung-Dao” procede do chinés orixinal “Qingjing” (o benefactor) e ten por obxecto promover o “Dao”, un concepto filosófico confuciano que significa “o camiño correcto do coñecemento e da educación”.
García Mira é Doctor en Psicoloxía por la Universidade de Santiago de Compostela, é profesor de Psicoloxía Social e Ambiental na Universidade da Coruña e profesor visitante da Universidade de Bath. É presidente da International Association for People-Environment Studies e con este recoñecemento suma unha distinción máis na súa brillante carreira académica, que se une a outras como a de “Doctor Honoris Causa” pola Universidade Alexandru Ioan Cuza de Iași (Romanía), concedida en 2018, ou a distinción de “Académico” da International Association of Applied Psychology (a sociedade de psicoloxía máis antiga do mundo), concedida tamén en 2018.
Ricardo García Mira foi tamén Profesor Visitante Distinguido da Universidade do Estado de Texas (2002) e da Cornell University (2019), ambas dos Estados Unidos, e máis recentemente da Universidade de Tokyo (2021) e da Universidade de Santo Tomás de Manila (2025).
