Ribeira preparase para o Entroido e para unha das citas máis celebradas do Barbanza, o festival de Murgas e comparsas. Unha cita que terá lugar o vindeiro 17 de febreiro e na que se repartirán seis mil euros en premios.
O festival desenvolverase a partir das 17.00 horas, nunha carpa que se instalará no Malecón. Carla Núñez e Marcos López, caras do podcast Todo Mal, exercerán de presentadores dunha gala onde non faltará a retranca e o humor.
A concelleira de Cultura, Ana Barreiro explica que “presentamos un pequeno avance da programación cultural e festiva na que estamos traballando para dinamizar o noso municipio e vivir o Entroido como se merecen. Non podía faltar o tradicional festival de murgas e comparsas que contará con dous presentadores excepcionais como son Carla Núñez e Marcos López, do podcast Todo Mal, polo que as risas e a interacción co público están máis que aseguradas”.
Tal e como se recollen nas bases, establécense tres categorías: murgas adultos, murgas infantís e comparsas. A data límite de inscrición é o domingo, 8 de febreiro. A participación formalizarase presentando a documentación no Rexistro Xeral do Concello, ben sexa de maneira presencial ou telemática a través da sede electrónica municipal.
A contía de 6.000 euros destinada a este evento en 3.200 euros para as gratificacións e 2.800 euros para os premios. As gratificacións por participación serán dun máximo de 200 euros por cada murga adulta, infantil ou comparsa.
No caso de que algunha entidade ou asociación estea representada en murga e comparsa, a gratificación será en conxunto por un importe de 299 euros.
As murgas na categoría de adultos poderán optar a un primeiro premio de 1.000 euros, un segundo de 600 euros, un terceiro de 400 euros ou a distinción á mellor murga local con 800 euros. Toda a información detallada e anexos están dispoñibles na web municipal https://www.ribeira.gal/
