Noia, 11/03/2026 – O alcalde de Noia, Fran Pérez, mantivo unha conversa telefónica co presidente de Portos de Galicia, José Antonio Álvarez Vidal, na que lle trasladou o deterioro que sofre a pasarela do paseo marítimo.
Ao día seguinte de esta chamada unha inspección técnica enviada por Portos de Galicia desprazouse ata Noia para analizar sobre o terreo o estado da pasarela.O obxectivo elaborar un informe técnico que permita avanzar nas actuacións necesarias para a súa reparación.
A pasarela xa fora noticia o pasado 11 de febreiro, cando unha parte importante da estrutura rompeu durante unha treboada e caeu á ría. Tras aquel incidente procedeuse ao precinto da zona afectada.
Posteriormente, e pasado aproximadamente un mes desde aquel suceso, a Policía Local de Noia decidiu pechar a totalidade da pasarela o pasado domingo debido ao seu avanzado estado de deterioro e á falta de seguridade para as persoas usuarias.
Durante a conversa mantida co alcalde, José Antonio Álvarez Vidal agradeceu a rápida intervención da Policía Local de Noia, ao tempo que comunicou que xa está encargada a reparación da parte da estrutura que caeu ao mar o pasado mes de febreiro.
Pola súa banda, o alcalde de Noia agradeceu ao presidente de Portos de Galicia o interese e a implicación amosadas pola institución ao longo dos últimos días. Ambas administracións coincidiron na importancia de manter unha coordinación constante e traballar de maneira conxunta para avanzar na solución desta situación.
Dende o Concello de Noia subliñan a relevancia da inspección técnica realizada por persoal de Portos de Galicia, xa que permitirá avaliar con detalle o estado da infraestrutura e determinar os seguintes pasos a dar.
O Concello de Noia continuará colaborando e prestando todo o apoio necesario para facilitar que se leven a cabo as actuacións correspondentes e que a pasarela do Paseo Marítimo poida recuperarse nas mellores condicións posibles para o uso da veciñanza e das persoas que visitan o municipio.
