O recentemente elixido alcalde de Lousame, Esteban Ares, reuniuse co Presidente da Xunta, Alfonso Rueda, para tratar posibles axudas do goberno autonómico para o concello. O tema central foron unha serie de intervencións en vías e estradas do concello.
Nos últimos anos a Xunta executou diferentes actuacións dirixidas á rede viaria en Lousame como a mellora do firme e ensanche da AC-308 ou o reforzo do firme no vial de Portobravo a Tállara dende a DP-1104 ata a DP-1105.
Colaboración da Xunta
Esteban Ares agradeceu o compromiso do presidente e da Xunta de Galicia en xeral co Concello de Lousame, como demostran “investimentos tan importantes como a construción da depuradora que dotará de saneamento a 382 veciños e veciñas de cinco aldeas do municipio, actualmente en execución por un importe de máis de 950.000 euros”. Ares engadiu que “ademais de avaliar distintas actuacións nas estradas autonómicas ao seu paso por Lousame, aproveitei para presentarlle outras actuacións nas que levamos tempo traballando dende o Concello como son a creación dun polígono empresarial e a humanización da praza Teodomiro Hidalgo e a súa contorna, pois é un lugar onde conflúen moitos servizos para a veciñanza como o Concello, o Centro de Saúde, o tanatorio, a farmacia, a Casa da Cultura ou o Centro de Día”.
