Retraso no pago das bolsas de comedor que se asignan en Compostela

Compostela, 23/04/2026 – O concelleiro do Partido Popular en Santiago, Borja Rubio, compareceu ante os medios para denunciar a situación de impagos por parte do goberno municipal ás entidades colaboradoras dos servizos de comedor escolar e actividades extraescolares, unha situación que cualificou de “auténtica vergoña social”.

Rubio advertiu que “Se un neno queda sen comedor, a responsable será a alcaldesa”. A xuizo do concelleiro popular o problema “traspasa a ineficacia política e afecta directamente ás familias e aos nenos da cidade”.

Engadiu que “O goberno de Santiago está xogando coa alimentación dos nosos nenos e coa conciliación das familias desta cidade”. Detallou que a día de hoxe (mércores 22), o Concello acumula cinco meses sen abonar as bolsas de comedor escolar e de actividades extraescolares o que supón “cero euros ingresados ás entidades colaboradoras”, algunhas das cales arrastran xa débedas superiores aos 35.000 euros.

Rubio advertiu de que esta situación está “asfixiando economicamente a quen fai o traballo que o goberno é incapaz de xestionar: garantir a igualdade de oportunidades nos nosos colexios”. Rubio tamén rexeitou que o goberno poida escudarse en cuestións administrativas lembrando que en xullo de 2024 o Pleno aprobou unha iniciativa do Partido Popular para modificar o sistema de pagos e estudar anticipos ás entidades, unha proposta que “o goberno decidiu gardar nun caixón tras absterse”.

Problemas técnicos

Ante a denuncia do PP, o goberno municipal emitiu un comunicado no que “lamenta o atraso no pago das bolsas de comedor escolar e entende o malestar das ANPAs, principais prexudicadas da demora”.

Segundo explica o atraso no pago está vinculado á posta en marcha dunha nova aplicación contable no Concello de Santiago e aos problemas rexistrados no proceso de migración de datos desde a aplicación informática anterior “O atraso no pago ten, polo tanto, motivos técnicos e non responde a cuestións políticas, como traslada o Partido Popular”.

No comunicado o goberno municipal lembra que “ o Concello de Santiago destina na actualidade 1,1 millón de euros a estas axudas, que chegan a preto de 2.000 nenos e nenas. No curso 2013-2014, o último cun Goberno do PP en Santiago, o orzamento destinado ás bolsas de comedor era de 87.500 euros, e o número de nenos e nenas beneficiarias non chegaba ás 300. Polo tanto, os datos non resisten comparativa posible e avalan que o Goberno reivindique a aposta que se está a facer neste mandato por defender o público, pola conciliación, e polos dereitos sociais de todos os veciños e veciñas de Santiago”.