Ordes, 25 de xaneiro do 2021 – O BNG de Ordes reclamará no vindeiro pleno que parte do remanente de tesourería se dedique ao saneamento do rural e a promoción de vivenda protexida.
O Bloque lembra que a finais do ano pasado o alcalde, José Luís Martínez, asegurou que o remanente de tesourería do concello era de 5.223.000 €. O voceiro nacionalista, Pablo Vidal, considera que iso é un exemplo de que “o alcalde non sabe en que investir os fondos dos que dispón, e prefire aforralos antes de investilos en solucionar carencias da veciñanza”.
Desde o BNG de Ordes propoñen investir 1.200.000 € para a dotación de redes municipais de saneamento e abastecemento de auga no ámbito rural do. A este respecto, Vidal opina “que a día de hoxe existan no noso concello parroquias nas que non existe ningún tipo destes servizos públicos, supón unha mostra do esquecemento e abandono no que se atopan sumidas”.
Outra das propostas que formulan desde o BNG, radica en destinar 400.000 € ao impulso e dinamización do comercio e da hostalería, para o cal propoñen campañas como a levada a cabo no concello de Carballo con bonos onde ademais dos citados sectores, a propia veciñanza obteña beneficios dun xeito equitativo, campañas que segundo o Pablo Vidal “tiveron moito éxito en Carballo, foron efectivas e tiveron unha grande acollida entre a veciñanza e os sectores do comercio e da hostalería”.
Finalmente os nacionalistas avogan por empregar 3.000.000 € na adquisición dalgunhas obras que quedaron abandonadas trala crise do sector da construción, retomando a construción das mesmas e obtendo inmobles para destinar a vivendas de protección oficial e locais en planta baixa onde o concello podería ofertar novos servizos á veciñanza.
O voceiro nacionalista, Pablo Vidal, asegura que “con esta medida conseguimos facilitar o acceso a unha vivenda ás familias con escasos recursos ou a xente moza que procura a súa primeira vivenda, así como rematar co “feísmo” que supoñen as obras neste estado, as cales estase a comprobar que dificilmente sairán desta situación sen actuacións deste tipo”.
