Zona de Caramoniña na que se rehabilitarán as vivendas
Compostela, 17/03/2026 – Compostela ven de impulsar unha das medidas máis concretas, en materia de vivenda, dada nos últimos tempos. Rehabilitar un edificio propiedade do concello para a continuación alugalo a un prezo razoable.
Con esta medida o goberno municipal impulsa un parque público municipal de vivenda. A intención é seguir en esta liña, adquirindo máis inmobles, en principio no casco histórico. Uns alugueres que terían prezos contidos e aos que se accedería en función da renda da familia.
O concelleiro de Urbanismo, Vivenda e Cidade Histórica, Iago Lestegás, e a portavoz do goberno, Míriam Louzao, explicaron en rolda de prensa a iniciativa en materia de vivenda que ven de poñerse en marcha.
Case un millón de euros de investimento
A Xunta de Goberno Local adxudicou este luns a redacción do proxecto básico, proxecto de execución, estudo de seguridade e saúde e dirección facultativa das obras da rehabilitación do conxunto de cinco edificacións municipais na rúa da Caramoniña.
O investimento previsto en esta fase é de 49.997,20 euros (IVE incluído). O investimento total prevese que supere os 931.000 euros.
As cinco edificacións que serán rehabilitadas suman 587 m2 construídos e están situadas nunha parcela de 1.875 m2 de superficie, cualificada como equipamento público asistencial, que o Concello obtivo en 2005 por cesión obrigatoria polo desenvolvemento da unidade de execución U-4 do Plan especial da cidade histórica (edificios residenciais deseñados por Víctor López Cotelo).
Os cinco edificios municipais non están catalogados pero son representativos da arquitectura popular. Un deles está na parte máis baixa da rúa da Caramoniña e outros catro están agrupados na parte máis alta desta.
O concelleiro de Urbanismo indicou que esta actuación terá catro efectos positivos, a comezar por dar exemplo como administración pública. “A administración pública ten que dar exemplo e rehabilitar o patrimonio histórico”, afirmou.
Lestegás indicou que esta actuación permitirá recuperar tamén bens representativos da arquitectura popular, mellorar o estado da rúa da Caramoniña e “avanzar na creación dun parque municipal de vivenda en alugueiro na cidade histórica a través da rehabilitación do patrimonio abandonado”.
A actuación conta cun investimento total previsto de máis de 931.000 euros e está incluída nos proxectos da Estratexia de Desenvolvemento Integrado Local (EDIL) Horizonte Compostela. O Concello de Santiago captou máis de 8,6 millóns de euros nesa convocatoria.
Prazos
Os prazos deste contrato son tres meses desde a sinatura do mesmo para o proxecto básico; e dous meses para redactar o proxecto de execución e o estudo de seguridade e saúde.
O prazo de dirección da obra é simultáneo á execución da mesma e, unha vez rematada e da recepción, hai un prazo dun mes para o libro do edificio. En total, prevese unha duración de contrato de dous anos.
