Oroso, 4 de febreiro do 2021 – O concello de Oroso tampouco quere deixar pasar o entroido pero manterá as restricións sanitarias cun concurso de disfraces nas redes sociais.
A Concellaría de Cultura de Oroso márcase como obxectivo manter viva a tradición do entroido no municipio. Ademais dun concurso de fotografía nas redes sociais manterá o de creación de máscaras.
Concurso de fotografía na rede
O prazo de inscrición para o concurso está aberto ata o 12 de febreiro e poderán participar maiores de 18 anos, empadroadas no concello, e con eles menores conviventes ata un máximo de 10 persoas.
Os menores de idade, ou que non teñan plena capacidade de obrar, que desexen participar deberán facelo sempre coa preceptiva autorización do titular da patria potestade ou tutela.
Regras do concurso
No momento de compartir a fotografía coa que se participa nas redes sociais (Facebook ou Instagram) os concursantes terán que etiquetar ao Concello de Oroso e mencionalo co hastag #enTROIdoOroso. Haberá 15 premios por importe de 100€ para gastar no comercio e hostalería local.
O xurado terá en conta os seguintes criterios:
- a) Calidade artística do disfrace
- b) Composición na realización da fotografía
- c) Orixinalidade
- d) Utilización de elementos tradicionais do Entroido
- e) Mensaxe en galego
- f) Esforzo e dedicación do/a promotor/a no resultado
Concurso de máscaras
O concello manterá o habitual concurso de máscaras no que se definen tres categorías de 7 a 9 anos, de 10 a 12 e mais de 13 anos. Serán máscaras orixinais non premiadas en outros concursos e o tema é libre. Tamén se aceptarán ademais das máscaras, que cubran todo o rostro, antefaces.
O xurado valorará os acabados, a creatividade, a estética e o bo gusto. Os concursantes presentarán as súas máscaras nas oficinas do Centro Cultural de Fernando Casas e Novoa, de luns a venres en horario de 9 a 14h e de 17 a 20:30h, tendo como data límite de presentación o 11 de febreiro de 2021, antes das 20:30h.
Os premios dos gañadores serán os seguintes:
Categoria Infantil 1 (de 7 a 9 anos): Gañador: Vale regalo por valor de 70€, Finalista: Vale regalo en Juguettos por valor de 45€
Categoria Infantil 2 (de 10 a 12 anos): Gañador: Vale Equip@t 100€, Finalista: Vale Equip@t 60€
Categoria Xeral, Gañador: Vale 120€ Restaurante Os Mariñaos, Finalista: Vale 70€ As Esencias.
M’ais informacion na web oficial do concello
