Bisbarra, 18 de xaneiro do 2023 – A Estrada acolleu a presentación da rede galega de parques sen fume á que se incorporan de partida dezaoito concellos.
O Conselleiro de Sanidade, Julio García Comesaña, foi encargado de presentar a iniciativa. O Conselleiro estivo acompañado polo alcalde da Estrada, José López Campos, e explicou que a Rede de parques sen fume naceu a finais de novembro e como primeiro paso entregouse aos primeiros concellos en adherirse toda a sinalización precisa.
O proxecto está impulsado desde a Dirección Xeral de Saúde Pública da Consellería de Sanidade. O obxectivo “é crear máis espazos públicos libres de tabaco nas vilas galegas” dixo o Conselleiro que engadiu que continúa coa iniciativa de Praias sen fume, creada no 2016 e da que forman parte 80 concellos con 214 praias.
Segundo o conselleiro, tanto a rede galega de praias sen fume como a de parques, “teñen un fin educativo e de sensibilización social, salientando a importancia da conduta da poboación adulta, para que sirva de modelo para os máis novos”. De aí que os obxectivos de parques sen fume sexan a promoción dunha vida sen tabaco e a desnormalización do seu consumo; así como o respecto e coidado dos espazos públicos e do medio ambiente.
Os concellos participantes nesta iniciativa adquiren unha serie de compromisos entre os que citou, a identificación e sinalización dos parques con materiais da rede facilitados pola Consellería de Sanidade. Ademais, os concellos comprométense a difundir entre a poboación os folletos informativos e de sensibilización. Tamén se comprometen a desenvolver actividades encamiñadas a lograr unha sociedade libre de tabaco, así como dar soporte a accións levadas a cabo no ámbito escolar, e, así mesmo, organizar e impartir charlas sobre os beneficios de non fumar.
Ademais da Estrada, participan xa da iniciativa os concellos de Agolada, Moraña, Mos e Ribadumia na provincia de Pontevedra. Corcubión, Bergondo, Mazaricos, Ponteceso, Porto do Son, Boiro, Neda e Pontedeume na da Coruña. Riotorto, Cospeito e Monforte de Lemos en Lugo e Pereiro de Aguiar e A Merca en Ourense.