Ames, 09/04/2026 – O Paseo Fluvial de Bertamiráns, en Ames é tan querido como criticado en non poucas ocasións. Cando non é un vertido é un desbordamento ou simplemente, como é o caso, o seu mal estado.
O Partido Popular ven insistindo en máis dunha ocasión sobre o mal estado do paseo fluvial. O partido destaca que o seu mal estado afecta tanto a súa seguridade como a súa conservación. Lembra ademais que se trata de “un dos principais espazos naturais, de lecer e esparexemento do Concello de Ames, sendo ademais un enclave de grande valor ambiental vinculado ao río Sar e un lugar de referencia para a veciñanza e visitantes”.
Desta volta o Partido Popular ven de presentar unha moción para debater no próximo pleno ordinario. Os populares instan ó goberno municipal a realizar de maneira inmediata unha inspección técnica completa, identificando todas as deficiencias existentes en materia de seguridade, infraestruturas, saneamento e medio ambiente.
A maiores solicita que se redacte e execute, no prazo máis breve posible, un plan integral de rehabilitación do paseo fluvial. Poñen como medidas a incluir cando menos a reparación de camiños, pasarelas e mobiliario urbano, a adecuación e mellora da iluminación pública, a limpeza, desbroce e mantemento da vexetación, a reposición de elementos deteriorados ou inexistentes e a mellora da accesibilidade.
O PP considera que é urxente actuar sobre as infraestruturas de saneamento do paseo fluvial, en especial sobre colectores e puntos susceptibles de vertidos, garantindo que non se produzan filtracións nin derrames de ningún tipo ao paseo nin ao río Sar.
Para o PP “é necesario implementar un plan de mantemento periódico do paseo fluvial, con actuacións programadas que eviten o seu deterioro progresivo e establecer medidas de vixilancia e control ambiental, en coordinación cos organismos competentes, para previr e actuar ante posibles episodios de contaminación”.
Informes trimestrais
Para que estas peticións “non queden en papel mollado”, o PP pide que se de conta trimestralmente ó pleno municipal do grao de execución destas actuacións tan necesarias. Lembran que xa no ano 2016 instaba ó tripartito a limpar e manter o sendeiro á beira do río en óptimas condicións. No 2017 aprobouse por unanimidade unha proposta na que se pedía realizar un plan de actuación para reparar os elementos externos á conca do canle fluvial tales como papeleiras, bancos, muros de contención, fontes, etc. En 2022 advertíase da degradación progresiva do paseo, incluíndo riscos derivados da caída de árbores e da falta de mantemento, solicitando a elaboración dun estudo técnico e a execución de obras de mellora. Só dous anos máis tarde, o Partido Popular volveu insistir na necesidade de actuar, denunciando problemas graves como vertidos de augas fecais procedentes dun colector en mal estado, así como o abandono xeneralizado da vexetación, deficiencias na iluminación e unha imaxe impropia dun espazo público destas características.
A maiores de todas estas peticións os populares explican que “nos últimos tempos producíronse episodios de contaminación no entorno do paseo fluvial, con presenza de residuos, lodos e malos cheiros, o que evidencia a falta de control e mantemento desta zona”.
