A feira dos domingos de Padrón sempre foi un dos mellores mercados da bisbarra. Ao mesmo tempo sempre xerou polémicas por distintos temas, a limpeza do lixo un deles. Agora o PP padronés saca de novo o tema e pide axilidade tras o mercado dos domingos.
O voceiro popular, Ángel Rodríguez Conde, reclámalle publicamente ao goberno local de Padrón “moita máis dilixencia” na retirada e limpeza do lixo que xera cada semana o mercado dominical. E pide “evitar que a contorna do Paseo do Espolón e a canle do río Sar ofrezan unha imaxe lamentable”.
Desde o Partido Popular non se responsabiliza ao concello da “falta de civismo” dalgúns feirantes e do resto da xente que abandona e tira lixo na vía pública. A crítica ven pola “falta de celeridade na xestión da limpeza”. Rodríguez di que “Fan falta menos palabras e máis feitos” e lembra as críticas de Anxo Arca ao goberno anterior, así como a promesa incumprida de resolver este problema “a pesar de que xa leva gobernando dous anos e medio”. “A situación, lonxe de mellorar, empeorou, porque hai semanas como esta nas que chega o xoves e o lixo segue na ribeira do Sar, cando non o leva a auga”, asegura o voceiro popular. Ademais, lembra que o pasado mes de maio o alcalde anunciara un incremento da vixilancia, máis sancións e tamén amagara cunha subida das taxas aos feirantes pero “retirou a súa proposta unilateral da orde do día daquel pleno e non se volveu saber nada”.
