O Pino, 29 de marzo do 2022 – O Grupo Municipal Socialista do Pino reclamará no vindeiro pleno que o Concello solicite as axudas, destinadas a construcións de centros de día e residencias.
Trátanse dunhas axudas froito dun convenio entre a FEGAMP e o Consorcio Galego de Servizos de Igualdade e Benestar. Son investimentos con cargo aos fondos europeos e destinadas para os concellos de menos de 20.000 habitantes, dando prioridade aos de menor poboación e a todos aqueles que carecen de centros de día ou residencias, como é o caso do concello coruñés do Pino.
Solicitan explicacións
Nesta mesma moción os Socialistas esixirán ao popular, Manuel Taboada, que explique que motivos, ou causas, xustifican que o Concello renunciara á axuda, por un importe de 161.665€, concedida polo AGADER para a construción e posta en marcha do Centro de día de O Pino.
Critican que esta renuncia “de última hora” provocou que ningunha outra entidade pública ou privada puidese beneficiarse dos fondos do Programa Leader xestionados polo GDR Ulla Tambre Mandeo, “e atrasa a posta en marcha da instalación prevista para outubro do ano 2022”, afirman desde o PSOE.
Cualifican os feitos como graves e máis que reprochables “este é o respecto que mostra o actual Presidente do GDR, e Alcalde de O Pino, polo resto de axentes que forman GDR”, critica Óscar Vilar, voceiro do PSOE do Pino.
