Bisbarra, 19 de decembro do 2024 – A capacidade de certas empresas de acadar apoios cando están practicamente desafiuzadas pola xustiza fai que ameazas como a Mina de Touro reviva.
Este pasado martes, 17 de decembro, o Diario Oficial de Galicia, DOGA, sometía a exposición pública o proxecto da Mina de Touro para os concellos de Touro, O Pino, Arzúa e Vila de Cruces e marcaba un prazo de 30 días para a presentación de alegacións.
Consulta todo o que levamos publicado sobre a Mina de Touro ao longo dos últimos anos
O DOGA recolle que o proxecto foi declarado no pasado mes de xuño como PIE, Plan de Interese Estratéxico. Onte mércores chegaba o tema ao Parlamento de Galicia por medio do BNG e da Deputada Iría Carreira que criticaba a reapertura da Mina de Touro “polos danos económicos e ambientais e por favorecer só a grandes empresas privadas que aproveitan os recursos naturais galegos sen que quede aquí ningún beneficio, senón o impacto sobre ecosistemas e sectores produtivos xa profundamente danados”.
A deputada da zona preguntou pola vía de urxencia no Parlamento pola posición da Xunta diante deste proxecto despois da publicación do DOGA. O proxecto afectará aos catro concellos porque inclúe a construción dunha liña de alta tensión desde o encoro de Portodemouros, algo que impactará sobre o río Ulla e a ría de Arousa.
Un proxecto xa parado?
Iría Carreira lembrou no Parlamento que o proxecto non variou moito desde que fora paralizado grazas á oposición veciñal “Atopámonos cun proxecto que non ten cambios substanciais co de 2017 e que foi rexeitado en 2020, até o punto que nin sequera ten os datos analíticos actualizados”.
A a lei de avaliación ambiental, no seu artigo 39.4, recolle a posibilidade de inadmitir o proxecto por non ter diferenzas substanciais a respecto dun que xa tivo unha declaración de impacto ambiental negativa. A deputada nacionalista quixo saber se a conselleira “confía no criterio dos e das técnicas da Xunta que xa denegaron o proxecto no 2020”, e “por que non fai uso do artigo 39.4 da Lei de Avaliación ambiental. Porque non lles interesa, afirmou, porque isto non é unha decisión técnica, é unha decisión política que o que fan é deixar campo libre para as empresas”.
Iria Carreira rematou a súa intervención trasladándolle á conselleira unha pregunta dun veciño de Touro: “Como van confiar na Xunta de Galiza, que leva permitindo a contaminación do río Pucheiros e de todos os ríos de Touro desde que pechou a mina e que agora van aprobar este proxecto?”.
