Touro, 11/05/2026 – O complexo proceso administrativo, e xurídico, da empresa Cobre San Rafael con respecto á mina de Touro ven de dar unha volta máis. O TSXG estima un recurso presentado pola empresa e anula a negativa da Xunta de Galicia á actualización do proxecto.
Na práctica, e explicado dun xeito sinxelo, o TSXG o que fai e dicir que a Xunta de Galicia non tivo en conta certos informes presentados por Cobre San Rafael sobre o proxecto para a mina de Touro. Ou, cando menos, que non os tivo en conta como debería.
Isto autoriza a reapertura da mina? Non; o que fai a sentencia é obrigar á Xunta a un novo trámite no que se presente o proxecto e sexa revisado de novo. Máis burocracia e máis difícil saber que pasará.
Os cambios no Tribunal
Esta resolución abre paso ás suspicacias da veciñanza por quen a toma. O Tribunal Superior de Xustiza de Galicia, TSXG, renovou en marzo a presidencia da Sala de lo Contencioso-Administrativo e unha das primeiras decisións foi o traslado dos maxistrados que emitiran varias sentencias contrarias aos parques eólicos.
Esta mesma sala é a que agora estima o recurso de Cobre San Rafael relativo á mina de Touro. Os cambios na presidencia de esa sala parecerían presuntamente destinados a abrir portas a proxectos cuestionados desde os ámbitos ecoloxistas e veciñais.
A postura do concello
Consultado por Lindeiros, o concelleiro de Medio Ambiente de Touro, Darío Rey, mostra a súa preocupación pola nova situación “preocupa moito que esta resolución chegue despois dos cambios producidos na Sala do TSXG e do relevo de maxistrados que viñan tratando estes procedementos. Son circunstancias que, cando menos, alimentan dúbidas”.
Rey explica que en calquera caso o problema de fondo é o mesmo “nin o proxecto anterior nin o actual aclaran con rigor o impacto real sobre as augas, as captacións privadas e os mananciais da contorna. Hai numerosos recursos hídricos que non aparecen recollidos na documentación presentada pola empresa”.
O concello traballa xa nun informe pericial independente para mapear e identificar todos os recursos hídricos potencialmente afectados e contrastar a información que figura no proxecto. Para o concelleiro a prioridade “é defender con datos, rigor técnico e todas as garantías legais os intereses da veciñanza e do territorio”.
Darío Rey é moi crítico tamén coa actitude da empresa “cómpre desmontar a propaganda da empresa sobre unha suposta restauración ambiental exemplar. A realidade é que, máis de 30 anos despois do peche da explotación, os ríos da contorna seguen presentando presenza de metais pesados e importantes afeccións ambientais que continúan xerando preocupación entre a veciñanza e numerosos colectivos. Os feitos falan por si sós”.
O concello non descarta se é preciso “acudir aos xulgados para protexer a auga, a saúde pública e o medio ambiente”. De novo a minería convértese en centro da actualidade e as dubidas sobre os proxectos son máis que as certezas.
