Axenda, 7 de agosto do 2024 – O escritor e xornalista Ramón F. Reboiras volve este mércores ao seu pobo para presentar o seu novo libro “El chevrolet de Pessoa”. A cita na Casa da Cultura de Dodro ás oito da tarde.
No seu novo volume Reboiras toma uns versos do poeta luso Pessoa como fío condutor da novela “Na estrada de Sintra, cada vez máis preto de Sintra. Na estrada de Sintra, cada vez menos preto de min”. Por medio deles conta escenas dunha vida que se extingue, instantes nos que un pode atopar humor, compañeirismo e familia.
Ramón F. Reboiras presentou “El chevrolet de Pessoa” o pasado mes de marzo en Madrid nun acto no que foi entrevistado pola xornalista Karmentxu Marín, escoitáronse os poemas de Pessoa na voz de Marta Barriuso e contou coa presencia, entre outros, do Director da Casa de Galicia en Madrid, Javier Vázquez.
Ramón F. Reboiras (San Xián de Laíño, Dodro, 1961) foi xefe da sección de cultura de El Independiente, director de Cinemanía, redactor xefe de Rolling Stone e director cultural da Fnac en España. Columnista na edición galega de El País, colaborou en Babelia e Harper’s Bazaar e foi director da revista de viaxes Orizon. Na actualidade dirixe a revista mensual Tinta Libre.
