Seguen as queixas polas deficiencias en centros de saúde

Ordes, 29/04/2026 – As queixas polo estado dos centros de saúde son tan habituais que comezan a deixar de ser nova. Este pasado luns o BNG de Teo convocaba unha concentración diante do de Calo; antes o concello de Val do Dubra enviaba unha carta á Consellería pola supresión do servizo os sábados pola mañá; o mesmo motivo serve aos socialistas de Porto do Son para unha recollida de sinaturas…

Tamén o PSdeG ven de levar ao Parlamento de Galicia o estado do Centro de Saúde de Ordes. Os socialistas esíxelle á Xunta de Galicia que o rehabilite con particular atención ás pingueiras que existen na consulta de pediatría.

 O Deputado Aitor Bouza explicaba que “O noso grupo municipal leva traballando xa insistentemente para que se poña solución á situación absolutamente calamitosa que hai no centro de saúde nos últimos anos”.

Bouza salienta que se trata dunha consulta “na que van nenos e nenas e que a día de hoxe non se atopa nas condicións adecuadas”, que carece dunha “salubridade e unha seguridade adecuadas”. “Non podemos obviar que realmente a seguridade dos nenos e das nenas para unha atención digna e en condicións óptimas é máis que necesaria”, engade.

“Esiximos, polo tanto, solucións inmediatas e que se incorpore tamén unha partida orzamentaria neste propio exercicio”, apunta Bouza, “para que se poida acometer todas estas rehabilitacións, que non son de agora, non son novas, e que son coñecidas por parte da Xunta de Galicia”. “O único que fai é mirar cara outro lado mentres os nenos e nenas de Ordes teñen que ir cun chuvasqueiro para poder ser atendidos no centro de saúde”, conclúe.