Bisbarra, 6 de outubro do 2023 – O grupo socialista denunciou no Parlamento a “arbitrariedade” da Xunta no reparto de fondos da Consellería de Deporte que ignora desde hai anos as necesidades de Dodro.
A parlamentaria socialista Noa Díaz pediulle á Xunta que asuma a reparación da cuberta do polideportivo de Dodro, que o concello non pode asumir polo elevado custe. Díaz preguntou na Comisión Institucional do Parlamento as razóns para ignorar esta obra cando asume a totalidade do orzamento de actuacións semellantes noutras localidades.
Díaz explicou que a dirección xeral do Deporte leva dende 2020 sen atender ás peticións do Concello de Dodro e “non son quen de asinar un convenio que sexa o máis proporcional posible aos recursos dispoñibles do concello”. Lembrou que o proxecto de reforma ten un custe de 200.000 euros, que son “inasumibles” para un Concello que manexa un orzamento de 2,7 millóns de euros.
A socialista engadiu que o alcalde, o socialista Xavier Castro, ten mantido reunións co secretario xeral para o Deporte sen ter obtido ata o momento ningún resultado práctico, xa que “aseguran que poderían colaborar no financiamento, pero non de maneira suficiente, e moito menos asumindo cada administración un terzo do custe, como parece propoñer a Xunta”.
Noa Díaz advertiu ademais que o concello está sendo excluído de tódalas peticións de subvencións que ven de solicitar. Criticou tamén que a Xunta “non teña dúbida á hora de facer excepcionalidades con outros concellos que están na súa meirande parte gobernados polo PP, e aos que lles cobren a totalidade dos gastos”.
Noa Díaz subliñou que a cuberta deste pavillón do Concello de Dodro se atopa nun estado moi deficiente, con serios problemas de condensación e pingueiras, mala iluminación e mala acústica. Todos estes problemas, explicou, loxicamente non permiten a práctica de moitas modalidades deportivas, e as que xa existen non poden desenvolverse en determinadas épocas do ano.
