Bisbarra, 28 de xuño do 2018 – A oposición a mina de Touro o Pino duplícase para estar no pleno de O Pino, que rexeita unha moción contraria ao proxecto, e na xunta de accionistas de Atalaya Mining en Londres, sorprendendo con pancartas aos que acudían ao recinto onde se celebraba.
Este mércores Óscar Vilar Chento (PSdeG) e José Luís Vidal Brocos (BNG), concelleiros en O Pino, presentaban de novo unha moción instando ao goberno local a rexeitar o proxecto de mina e a esixir a restauración dos danos causados pola explotación abandonada no ano 1986. A moción chegaba despois de que se coñeceran os últimos informes sectoriais, na maioría desfavorables, pero atopouse coa negativa do alcalde, Manuel Taboada, e do grupo popular que dixeron non coñecelos por non estar persoados e votaron en contra quedando a proposta rexeitada.
O contido dos informes sectoriais emitidos polos técnicos da Xunta xa coñecidos, que o goberno local de O Pino di descoñecer, deixa constancia dos numerosos aspectos negativos e deficiencias que presenta o proxecto de Cobre San Rafael. Segundo os técnicos da Xunta de Galicia, as explotacións gandeiras “poden ver afectados tanto o subministro como a calidade da auga da que se abastecen ao producirse a destrución dos acuíferos e a contaminación química derivada da disolución química e arrastre dos diferentes compostos químicos na auga de chuvia”; “as explosións e voaduras poden repercutir no benestar animal”; “pode ocasionar unha intoxicación por cobre na gandaría”; respecto ás voaduras “non se fai unha avaliación detallada sobre o seu impacto na poboación”; “non se fai unha avaliación dos posibles materiais radioactivos naturais que se poden atopar asociados ao cobre na explotación (uranio, torio e radio e produtos da súa desintegración, como o radon)”.
O informe de Medio Ambiente, dos máis contundentes, fala tamén de “inconcrecións“, “incongruencias”, e de “cuestións non tratadas que precisan dunha argumentación con base científico-técnica sólida e contrastada” respecto da impermeabilización dos residuos perigosos. Son os datos que utiliza a Plataforma Veciñal Mina Touro – O Pino NON para opoñerse ao proxecto, pese as acusacións, precisamente e paradóxicamente, de Cobre San Rafael de facelo con “argumentos sen base técnica”.
Pancartas en Londres
A Xunta de accionistas de Atalaya Mining, celebrada este mércores en Londres, atopouse na entrada con varios membros de organizacións contrarias aos proxectos da multinacional en España que mostraban con pancartas a súa oposición. Acompañado por membros de London Mining Network, Contraminacción, Ecologistas en Acción, The Gaia Foundation e Yest to life no to mining, Luis Gallardo, representando á Plataforma Veciñal Mina Touro – O Pino NON interveu ante os accionistas explicando que “Atalaya di que ten o apoio do goberno galego e tamén o apoio das comunidades locais. Isto é completamente falso”. Continuou facendo referencia ás incompatibilidades e deficiencias nomeadas nos informes sectoriais da Xunta de Galicia resaltando que “incluso o Instituto Geológico y Minero de España expresou dúbidas acerca das estimacións económicas” e que “a manifestación de Santiago de Compostela contou coa participación de políticos de tódolos partidos, incluso do que está no goberno”. Para concluír que “o proxecto mineiro de Touro non é realista”.
