Teo, 28 de xaneiro do 2021 – O pleno municipal celebrado este mércores en Teo desvelou que concello e concesionaria traballan nunha opción para manter a piscina aberta.
No apartado de rogos e preguntas Manuel Barreiro do BNG preguntaba pola situación do servizo ante a fin do contrato da piscina nos vindeiros meses. O alcalde, Rafa Sisto, fixo un resumo do sucedido ata o momento e explicou que se traballa nunha prórroga entre contratos.
Un tema complexo
Sisto comezou dicindo que se trataba dun tema complexo. A piscina estaba tendo un bo rendemento que posibilitaba que no seguinte contrato o canon anual de 32.000 euros, que o concello ten que pagar á concesionaria, fora eliminado.
A chegada da pandemia mudou todo o escenario. O concello tiña que tomar unha decisión sobre o servizo antes do verán pasado para que a licitación chegara antes do vindeiro mes de abril.
A concesionaria propuxo unha prórroga pero, dada a crise sanitaria, solicitaba unha compensación económica ante a imposibilidade de que se cumprira o contrato. A empresa adevertía tamén ao concello que sacar o concurso era un risco xa que as empresas non se arriscaban a participar ante a incerteza do escenario actual.
Opcións actuais para a piscina
Así as cousas, rafa Sisto explicaba que o concello traballaba en dúas opcións principais: o peche da piscina, co que suporía para os 1.900 abonados, ou a municipalización temporal
O pasado luns empresa e concello mantiñan unha reunión na que aparecía unha terceira vía, unha prórroga entre contratos
O alcalde engadiu que unha vez valorada a proposta presentada pola empresa convocarase a xunta de voceiros para explicar cales son as decisións ao respecto. A falta de máis datos é doado pensar que a empresa reduciu na súa iniciativa as demandas económicas da proposta presentada no 2020 pero será algo que se verá en vindeiras datas.
